ნეტგაზეთი | ახალგორში „შავი სიები“ გამოაკრეს, 300-მდე ადამიანს გადაადგილება შეეზღუდა | DRI ახალგორში „შავი სიები“ გამოაკრეს, 300-მდე ადამიანს გადაადგილება შეეზღუდა | DRI – Netgazeti
RU | GE  

ახალგორში „შავი სიები“ გამოაკრეს, 300-მდე ადამიანს გადაადგილება შეეზღუდა | DRI

დემოკრატიის კვლევის ინსტიტუტის [DRI] ცნობით, მიმდინარე წლის მაისის ბოლოს სამხრეთ ოსეთის დე ფაქტო მთავრობამ ახალგორის მოსახლეობისთვის დაწესებული შეზღუდვები კიდევ უფრო გაამკაცრა.

კერძოდ, თუკი აქამდე საქართველოს დანარჩენ ტერიტორიაზე მოსახვედრად ე. წ. „პროპუსკის“ მიღება ახალგორში მცხოვრებთა დიდი ნაწილისთვის გაწელილი და მტკივნეული პროცესი იყო, ახლა ნებართვის მიღება შეუძლებელი გახდა.

ორგანიზაციის ინფორმაციითვე, ახალგორის რაიონულ ადმინისტრაციაში გამოიკრა იმ ადამიანების „შავი სია“, ვისაც გადაადგილების ნებართვაზე უარი გაურკვეველი ვადით ეთქვათ. სიაში 300-მდე სახელი და გვარია. უარის თქმის კრიტერიუმები და მიზანი უცნობია.

„ოსური პასპორტის“ მფლობელები ე. წ. საზღვრის გადაკვეთას „პროპუსკის“ გარეშეც ახერხებდნენ. თუმცა ახლა „შავ სიაში“ ე. წ. ოსური პასპორტების მფლობელებიც მოხვდნენ. მათთვის უცნობია, ერთი მხრივ, რა მიზეზით ეთქვათ უარი, მეორე მხრივ კი, რა გავლენა ექნება ამას მათ მიმოსვლაზე დანარჩენი საქართველოს ტერიტორიაზე. „შავი სიების“ არსებობა რეგიონში შიშის ატმოსფეროს კიდევ უფრო აძლიერებს.

აღნიშნულ „შავ სიებს“, როგორც DRI წერს, თან ერთვის სამხრეთ ოსეთის დე ფაქტო მთავრობის კიდევ ერთი გადაწყვეტილება, რომელიც ქართულ ნომრიან ავტომობილებს ეხება.

‘ასეთი ავტომანქანების მფლობელებს საშუალება ეძლევათ, თავიანთი სატრანსპორტო საშუალებებით საქართველოს დანარჩენ ტერიტორიაზე გადავიდნენ, თუმცა მანქანის უკან შემოყვანის უფლება არ აქვთ. ამასთან, გაურკვეველია იმათი ბედიც, ვისაც მანქანა არ გაჰყავს, მაგრამ, როგორც ჩანს, ცხინვალში ქართული ნომრების გამო გადაადგილებას ვერ შეძლებს. ამ შემთხვევაში ზარალდებიან არა მხოლოდ მანქანის მფლობელები, არამედ ისინიც, ვინც ამ მანქანებს, როგორც საზოგადოებრივ ტრანსპორტს, ისე იყენებდა. ამ შეზღუდვის გამო ახალგორს ის სოფლები მოწყდება, რომლის ხანდაზმულ მოსახლეობასაც იაფი ტრანსპორტი ჰაერივით სჭირდება ბაზისური სოციალური და ჯანდაცვის სერვისების მისაღებად’.

დემოკრატიის კვლევის ინსტიტუტის შეფასებით, სამხრეთ ოსეთის დე ფაქტო მთავრობის პოლიტიკის მიზანი, რომელიც სოციალური მდგომარეობის ხელოვნურ დამძიმებას და რეგიონის მარგინალიზაციას იწვევს, სავარაუდოდ, ახალგორის მოსახლეობის იმ წერტილამდე მიყვანაა, რომელიც მათ საკუთარი საცხოვრებლის დატოვებისკენ უბიძგებს.

“ეს ვარაუდი უკვე გამოკვეთილ ტენდენციას ეფუძნება. ამ ბოლო პერიოდში დემოკრატიის კვლევის ინსტიტუტისთვის ცნობილი გახდა, რომ ახალგორელ პედაგოგს, რომელიც ფაქტობრივ შინაპატიმრობაში იმყოფებოდა, ნება დართეს, ახალგორი დატოვოს, უკან დაბრუნების ნებართვის პერსპექტივის გარეშე. ასევე, იმ 25 ახალგაზრდას, რომლებმაც სკოლა წელს დაამთავრეს (სულ 519 მთელ სამხრეთ ოსეთში) უფლება აქვთ სწავლის გასაგრძელებლად დანარჩენ საქართველოს მიაშურონ, თუმცა, დიდი ალბათობით, უკან დაბრუნების უფლების გარეშე”. 

აღნიშნული ვითარება სამხრეთ ოსეთის დე ფაქტო მთავრობის ახლომხედველობაზე და საზოგადოების რეალური საჭიროებების აღქმის ბუნდოვანებაზე მეტყველებს. სამხრეთ ოსეთის ე.წ. რესპუბლიკა, 2008 წლის ომის შემდგომ, რუსული ფინანსური დახმარების უპრეცედენტოდ დიდი რაოდენობით მიმღებია(ერთ სულ მოსახლეზე), თუმცა ამან ტერიტორიის დეპოპულაცია ვერ შეაჩერა. ერთი მხრივ, ლიახვის ხეობაში გატარებულმა ეთნიკურმა წმენდამ, მეორე მხრივ კი, დანარჩენი საქართველოსგან მიზანმიმართული იზოლაციით გამოწვეულმა უპერსპექტივობამ სამხრეთ ოსეთის დემოგრაფია მთლიანად შეცვალა. ეთნიკურად ოსი მოსახლეობაც რუსეთის ფედერაციაში მიემგზავრება და ტოვებს საცხოვრებელს, თუმცა, უკან დაბრუნების პერსპექტივით. ამ ფონზე ალოგიკურია პოლიტიკა, რომელიც თანაბრად გაუსაძლის პირობებს უქმნის ქართველი და ოსი ეთნიკური წარმომავლობის პირებს ახალგორში, აიძულებს  მათ,  რომ მშობლიური მხარე დატოვონ.

დემოკრატიის კვლევის ინსტიტუტი მოუწოდებს საქართველოს ხელისუფლებას და საერთაშორისო აქტორებს, როგორც ჟენევის ფორმატში, ასევე, ოფიციალურ განცხადებებში ხაზი გაუსვან და რეაგირება მოახდინონ მსგავს ტენდენციებზე. კრიტიკულად მნიშვნელოვანია საზოგადოებისა და საერთაშორისო აქტორების მუდმივი, პროაქტიული, ინფორმირება მიმდინარე დარღვევებზე.

ნეტგაზეთის მასალების სხვა გამოცემებში გადაბეჭდვის წესი
ავტორი