„ერთიანი ნაციონალური მოძრაობის“ ერთ-ერთი ლიდერი ხატია დეკანოიძე ნინოწმინდის ბავშვთა პანსიონთან დაკავშირებით ამბობს, რომ სახელმწიფოს გულგრილობა ბავშვებზე ძალადობას დამატებით ბიძგს აძლევს.

ნინოწმინდის ბავშვთა პანსიონი საქართველოს მართლმადიდებელი ეკლესიის დაქვემდებარებაშია. ოფიციალური ინფორმაციით, აქ 56 ბავშვი ირიცხება, თუმცა ეპისკოპოსი სპირიდონი აცხადებს, რომ ეს რაოდენობა 150-ს აღწევს.

„გუშინდელ განცხადებაში, რომელიც გაავრცელა სახალხო დამცველმა. კერძოდ, საქმე ეხება იმას, რომ უკანასკნელი 5 წლის განმავლობაში საქართველოში გენპროკურატურას საქმე აქვს აღძრული უმძიმესი მუხლებით — ბავშვებზე ძალადობისა და გაუპატიურების.

ეს არის უმძიმესი მოცემულობა, როდესაც სახელმწიფოს გულგრილობა პირდაპირი დანაშაულია და მთელი ამ პერიოდის განმავლობაში ვერც გენერალურმა პროკურატურამ, ვერც შესაბამისმა უწყებებმა ვერ დაადგინეს გამოძიების ობიექტურობით ის, თუ რა ხდება ნინოწმინდის პანსიონში“, — აცხადებს ხატია დეკანოიძე.

მისივე თქმით, პირდაპირი პასუხისმგებლობა და მოვალეობა ბავშვების უსაფრთხოებაზე ეკისრება სახელმწიფოს:

„იქ არსებული უსაფრთხოების საკითხები, რომელიც ეხება ბავშვებს, უნდა ყოფილიყო სასწრაფო განგაშის საფუძველი, განგაშის ზარი უნდა ჩამოეკრა სახელმწიფოს.

სახელმწიფოს დანაშაულებრივი გულგრილობა პირდაპირ ახალისებს კონკრეტულ ადამიანებს ძალადობისკენ“, – ამბობს დეკანოიძე და ამატებს, რომ ენმ-ის პარლამენტში შესვლის შემდეგ ამ საკითხზე სახალხო დამცველთან აქტიურ მუშაობასა და თანამშრომლობას აპირებს.

ხოშტარია: “ყოველდღე უნდა იყოს აქცია ნინოწმინდაზე, შევიკრიბოთ 6-ზე პროკურატურასთან”