ნეტგაზეთი | მთავრობამ 27 იანვარი ჰოლოკოსტის მსხვერპლთა ხსოვნის დღედ გამოაცხადა მთავრობამ 27 იანვარი ჰოლოკოსტის მსხვერპლთა ხსოვნის დღედ გამოაცხადა – Netgazeti
RU | GE  

მთავრობამ 27 იანვარი ჰოლოკოსტის მსხვერპლთა ხსოვნის დღედ გამოაცხადა

საქართველოს საგარეო საქმეთა მინისტრის, დავით ზალკალიანის განცხადებით, მთავრობამ მიიღო გადაწყვეტილება, 27 იანვარი ქვეყანაში ოფიციალურად გამოაცხადოს ჰოლოკოსტის მსხვერპლთა ხსოვნის დღედ:

“დღეს მთავრობის სხდომაზე მიღებულ იქნა გადაწყვეტილება ჰოლოკოსტის მსხვერპლთა დღის გამოცხადებასთან დაკავშირებით. 27 იანვარი გამოცხადდა ჰოლოკოსტის მსხვერპლთა ხსოვნის დღედ და ვფიქრობ, რომ საქართველოსა და ისრაელს შორის მეგობრული ურთიერთობების და ქართველ და ებრაელ ხალხს შორის მრავალსაუკუნოვანი კავშირების გათვალისწინებით, ეს გადწვყეტილება მნიშვნელოვანია. როგორც აქამდე აღვნიშნავდით, მომავალშიც გაგრძელდება, მაგრამ ეს უკვე არის ოფიციალურად გამოცხადებული”, — ამბობს ზალკალიანი.

27 იანვარს ჰოლოკოსტის მსხვერპლთა ხსოვნის საერთაშორისო დღეა. 1945 წლის 27 იანვარს აუშვიცის საკონცენტრაციო ბანაკის ათასობით ტყვე გათავისუფლდა. დღეს ამ თარიღიდან 72 წელი გავიდა.

სიტყვით “ჰოლოკოსტი” 1933–1945 წლებში გერმანიის ნაცისტური ხელისუფლების და მისი მოკავშირეების მიერ ევროპის ტერიტორიაზე ებრაელების, ბოშების, საბჭოთა ტყვეების, შავკანიანი გერმანელების, ჰომოსექუალების და სხვა უმცირესობების მიმართ განხორციელებული გენოციდი აღინიშნება.

ჰოლოკოსტის შედეგად მიღებული ადამიანური მსხვერპლის ზუსტი რაოდენობა უცნობია, თუმცა ცნობილია, რომ ჰოლოკოსტს 6 000 000 ებრაელი შეეწირა.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.