შსს ცესკოსთან მყოფ მომიტინგეებს დაშლისაკენ მოუწოდებს და და მოსალოდნელი ზომების კერძოდ სპეცსაშუალებების გამოყენების შესახებ აფრთხილებს.
შსს ადგილზე მომიტინგეებს დაშლისაკენ ხმის გამაძლიერებლის საშუალებით აფრთხილებს. თუმცა როგორც ადგილიდან ნეტგაზეთის რეპორტიორი იუწყება, აქციაზე პოლიციამ ამ გაფრთხილებამდე გამოიყენა წყლის ჭავლი დემონსტრანტების წინააღმდეგ.
შინაგან საქმეთა სამინისტრომ წერილობითი განცხადებაც გაავრცელა უკვე მას შემდეგ რაც პირველად გამოიყენეს წყლის ჭავლი. შსს-ს განცხადებას უცვლელად გთავაზობთ:
“საქართველოს შინაგან საქმეთა სამინისტრო წარმოადგენს საზოგადოების უსაფრთხოებასა და მართლწესრიგის დაცვაზე პასუხისმგებელ უწყებას. სამინისტრო მთელი დღის განმავლობაში, აქციაზე უზრუნველყოფდა, როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ გასცდა კანონით დასაშვებ ფარგლებს.
დღის ბოლოს, ცენტრალურ საარჩევნო კომისიასთან მიმდინარე აქციის დროს, აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში, რაც კადრებშიც კარგად ჩანს და რისი საშუალებაც მათ პოლიციამ არ მისცა.
ვინაიდან აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ მისთვის კანონით მინიჭებული უფლებამოსილების ფარგლებში გამოიყენა პროპორციული ძალა.
შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, აქციის ორგანიზატორებსა და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. აქციის მიმდინარეობისას, სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი”, – ნათქვამია შსს-ს განცხადებაში.
