პარტია “ლელოს” დამკვირვებლის განცხადებით, ქუთაისში, 74-ე უბანზე დეზინფექციის ჩატარების მიზნით ოთახიდან ყველა დამკვირვებელი გაიყვანეს, რასაც უბნის თავმჯდომარე უარყოფს.
“ზოგი ტუალეტში იყო, ზოგმა ჩაი დალია. რა მოხდა მერე. ხომ შეიძლება, აქ როცა ხალხი არაა, ადამიანი ტუალეტში გავიდეს, არ იყო უბანი ცარიელი. ხან შევდიოდით და ხან გამოვდიოდით. რაც მთავარია, ვიდეოკამერა აკონტროლებს ამ ყუთს და ის არ გამორთულა”,- ამბობს კომისიის თავმჯდომარე გიორგი ჯავახაძე.
ხმაურის გამო რამდენიმე წუთის განმავლობაში უბანზე კენჭისყრის პროცედურა შეწყვეტილი იყო. ლელოს მაჟორიტარობის კანდიდატი ანა ნაცვლიშვილი ამბობს, რომ უბანზე ხმის მიცემის პროცედურა უნდა შეწყდეს და კამერის ჩანაწერი გადამოწმდეს:
“კამერის ჩანაწერებში უნდა შემოწმდეს, რომ უბანზე დაცული იყო ბიულეტენები და ყუთი. თუ ჩანაწერი დაადასტურებს, რომ ყუთი დაცული არ იყო, შედეგები უნდა გაბათილდეს”, – აღნიშნავს ნაცვლიშვილი.
