ნეტგაზეთი | ომბუდსმენმა აჭარის ტელევიზიაში მიმდინარე მოვლენებთან დაკავშირებით გაეროსა და ეუთოს წარმომადგენლებს მიმართა ომბუდსმენმა აჭარის ტელევიზიაში მიმდინარე მოვლენებთან დაკავშირებით გაეროსა და ეუთოს წარმომადგენლებს მიმართა – Netgazeti
RU | GE  

ომბუდსმენმა აჭარის ტელევიზიაში მიმდინარე მოვლენებთან დაკავშირებით გაეროსა და ეუთოს წარმომადგენლებს მიმართა

საქართველოს სახალხო დამცველმა აჭარის ტელევიზიაში მიმდინარე მოვლენებთან დაკავშირებით აზრისა და გამოხატვის თავისუფლების შესახებ მიმართა გაეროს ახლად არჩეულ სპეციალურ მომხსენებელს, ირენ ხანს და მედიის საკითხებზე ეუთოს წარმომადგენელს ჰარლემ დეზირს. ამის შესახებ ინფორმაციას ომბუდსმენის აპარატი ავრცელებს.

მათივე ინფრომაციის თანახმად, გაგზავნილ წერილებში სახალხო დამცველი ინფორმაციას აწვდის აღნიშნული მანდატის მქონე პირებს ტელეკომპანიაში მიმდინარე მოვლენების შესწავლის შედეგად გამოვლენილ დარღვევებზე, რაც, მათი თქმით, საფრთხეს უქმნის ქვეყანაში არსებულ მედიაპლურალიზმს და უარყოფითად აისახება გამოხატვის თავისუფლებაზე.

სახალხო დამცველი გამოთქვამს ვარაუდს, რომ აჭარის საზოგადოებრივ მაუწყებელში მიმდინარე მოვლენები ტელევიზიის სარედაქციო პოლიტიკის ცვლილებას ისახავს მიზნად.

ომბუდსმენი, ასევე, ხაზს უსვამს, რომ კრიტიკული მნიშვნელობისაა ჩარევებისგან თავისუფალი საზოგადოებრივი მაუწყებლის არსებობა ქვეყანაში, განსაკუთრებით- საარჩევნო წლის განმავლობაში.
“სპეციალურ მომხსენებლებთან გაგზავნილ წერილებში აღწერილ მოვლენებამდე, არაერთი ადგილობრივი თუ საერთაშორისო ორგანიზაციის შეფასებით აჭარის საზოგადოებრივი მაუწყებელი წარმოადგენდა მიუკერძოებელ ტელევიზიას, რომელიც საარჩევნო პროცესების გამჭირვალე და ბალანსირებული გაშუქებით გამოირჩეოდა”, — ნათქვამია ომბუდსმენის აპარატის მიერ გავრცელებულ ინფორმაციაში.
ამასთან ერთად, წერილებში სახალხო დამცველი ეუთოს წარმომადგენელსა და გაეროს სპეციალურ მომხსენებელს თხოვნით მიმართავს, დაინტერესდნენ წარმოდგენილი ინფორმაციით, საჯარო განცხადებით მიმართონ საქართველოს ხელისუფლებას, ან/და პირველივე შესაძლებლობისთანავე ოფიციალური ვიზიტით ეწვიონ საქართველოს, რათა ადგილზე შეისწავლონ წერილში აღწერილი გარემოებები.
სახალხო დამცველი იმედოვნებს, რომ ზემოაღნიშნულ საერთაშორისო მანდატის მქონე პირთა რეაგირება აჭარის მაუწყებელში მიმდინარე პროცესებზე, მნიშვნელოვნად შეუწყობს ხელს თავისუფალი მედიის არსებობას ქვეყანაში.
როგორც ცნობილია, 24 აგვისტოს სახალხო დამცველმა აჭარის ტელევიზიის დირექტორს მიმართა მაუწყებლის ყოფილი და მოქმედი თანამშრომლების შრომითი უფლებების აღდგენის, ასევე, მომავალში შრომით ურთიერთობაში განსხვავებული მოსაზრების, პროფესიული კავშირისადმი კუთვნილების ან/და სხვა ნიშნით დისკრიმინაციული მოპყრობისაგან თავის შეკავების რეკომენდაციით.
ნეტგაზეთის მასალების სხვა გამოცემებში გადაბეჭდვის წესი
ავტორი