გერმანიის ელჩი „ნეტგაზეთთან“ დამატებით კომენტარს აკეთებს ზელიმხან ხანგოშვილის საქმეში გერმანიის ფედერალური პროკურორის მიერ საქართველოს მთავრობის პრორუსულად მოხსენიებასთან დაკავშირებით.

გერმანიის მთავარი ფედერალური პროკურატურის 18 ივნისის პრესრელიზში საქართველოს მთავრობა „პრორუსულად“ იყო მოხსენიებული. განცხადებაში, რომელიც ფედერალურ გენერალურ პროკურორ პიტერ ფრენკს ეკუთვნოდა, ეწერა:

„[ხანგოშვილის] მკვლელობას წინ უძღოდა დაზარალებულის მტრული დამოკიდებულება რუსეთის ცენტრალური ხელისუფლების, მისი ავტონომიური რესპუბლიკების- ჩეჩნეთისა და ინგუშეთის მთავრობებისა და საქართველოს პრორუსული მთავრობის მიმართ“.

ამ ამბის გახმაურებიდან სულ რამდენიმე საათში გერმანიის საელჩომ გაავრცელა ელჩის განცხადება, სადაც ის ამბოდა, რომ „გამოყენებულია გაუგებარი ფორმულირება“ და  „საქართველოს მთავრობის რაიმე სახით დახასიათება არ წარმოადგენდა გერმანული სამართლებრივი უწყებების მიზანს“.

„ნეტგაზეთი“ ასევე დაუკავშირდა გერმანიის მთავარ ფედერალურ პროკურატურას ამ ნაწილთან დაკავშირებით კითხვით, თუმცა პასუხი ამ დრომდე არ მიგვიღია. პროკურატურის ოფიციალურ ვებ-გვერდზე კი განცხადება დღემდე იმავე, უცვლელი სახით არის განთავსებული.

„ნეტგაზეთმა“ ჰუბერტ ქნირშს 26 ივნისს დამატებითი კითხვები დაუსვა ამ საკითხთან დაკავშირებით, რაზეც ელჩმა გვიპასუხა:

„სასამართლოს დამოუკიდებლობა ჩვენც გვაქვს, გერმანიაში… გენერალური პროკურორი აქ, რომელსაც შეუძლია რაიმე მოიმოქმედოს, გააკეთოს განცხადებები, რაშიც მთავრობას არ აქვს უფლება, ჩაერიოს“.

„ჩემი განმარტება კვლავ ძალაშია — გენერალური პროკურორის მიზანი არ ყოფილა საქართველოს მთავრობის პოლიტიკური დახასიათება. მათ გაიმეორეს ფორმულირება, რაც გამოყენებული იყო მოწმეების მიერ და ამიტომ ვთქვი, რომ მათ შეეძლოთ, უფრო ფრთხილები ყოფილიყვნენ ამ სიტუაციაში“.

ელჩ ქნირშს ვკითხეთ, ეს ინფორმაცია მას პროკურატურასთან კონსულტაციის შემდეგ ჰქონდა თუ არა, რაზეც გვიპასუხა: „ეს, ცხადია, თავად ტექსტის ფრთხილი ანალიზით“…

პროკურატურის განცხადება - ვრცლად

რუსეთ-ჩეჩნეთის ომის ვეტერანი, 40 წლის ზელიმხან ხანგოშვილი 2019 წლის 23 აგვისტოს მოკლეს გერმანიის დედაქალაქ ბერლინში.

მეჩეთში სალოცავად მიმავალ ხანგოშვილს უცნობი პირი ელექტრონული ველოსიპედით მიუახლოვდა და სამჯერ ესროლა. ხანგოშვილი მაშინვე გარდაიცვალა.

გერმანულ, შემდეგ კი საერთაშორისო მედიაში მალევე გავრცელდა ცნობები მკვლელობაში ბრალდებულის სავარაუდო კავშირზე რუსეთის სახელმწიფო სპეცსამსახურებთან, რასაც დღემდე კატეგორიულად უარყოფს ოფიციალური მოსკოვი.

თავდაპირველად ჟურნალისტურ გამოძიებებში გამოკვეთილმა ბრალდებამ დღეს უკვე ოფიციალურ არხებში გადაინაცვლა.

ზელიმხან ხანგოშვილს 2015 წელს, 28 მაისს, თბილისში, მირზა გელოვანის ქუჩაზე შეიარაღებული პირები დაესხნენ თავს. მანქანაში მჯდარ ხანგოშვილს 8 ტყვია ესროლეს და დაჭრეს.

არასამთავრობო ორგანიზაცია „ადამიანის უფლებების სწავლებისა და მონიტორინგის ცენტრი“ (EMC), რომელიც გამოძიებას აკვირდებოდა, აცხადებს, რომ პროცესი ხარვეზებით მიმდინარეობდა.

EMC-ის თანახმადვე, ხანგოშვილის მიმართ რუსეთის სპეციალური სამსახურების ინტერესი ყოველთვის მაღალი იყო.

გამოცემა „აქცენტთან“, რომელიც ხშირად აშუქებს ეთნიკური ჩეჩნების პრობლემებს, თვითონ ზელიმხან ხანგოშვილი ამ თავდასხმას პირდაპირ უკავშირებდა რუსეთის წინააღმდეგ საომარ მოქმედებებში მონაწილეობას:

„არასდროს დამიმალავს, რომ რუსეთ–ჩეჩნეთის ომში ვიბრძოდი და ჩემი მეორე სამშობლოს ინტერესებს ვიცავდი. ამასთან, რუსეთ–საქართველოს 2008 წლის ომის დროს გავწიეთ ორგანიზება, შევკრიბეთ ქისტები და მზად ვიყავით საომრად. იქ, სადაც რუსეთის ინტერესების წინააღმდეგ და ჩემი ქვეყნის ინტერესების დასაცავად შემიძლია ბრძოლა. ამას მომავალშიც გავაკეთებ, ბუნებრივია, ჩემი შესაძლებლობიდან გამომდინარე. შესაბამისად, მე მათი ინტერესების დამაბრკოლებელი ფიგურა არა, მაგრამ ჭანჭიკი მაინც ვარ“, – გამოცემის თანახმად, ამას ამბობდა თავდასხმის შემდეგ ზელიმხან ხანგოშვილი.

ის მართლაც იყო გამორჩეული ფიგურა ჩეჩნეთშიც და საქართველოშიც. დაახლოებული იყო ჩეჩნეთის პრეზიდენტ ასლან მასხადოვთან, რომელიც 2005 წელს მოკლეს რუსეთის ფედერალურმა ძალებმა; ფიგურირებდა 2012 წლის ლოპოტის ხეობის/ლაფანყურის სპეცოპერაციის ეპიზოდშიც: ის მაშინ ხელისუფლებასთან თანამშრომლობდა და ახმედ ჩატაევთან ერთად აწარმოებდა მოლაპარაკებებს…

გაიგეთ მეტი ამ ამბავზე

საქართველოს დუმილი ხანგოშვილის მკვლელობაზე – რუსეთის შიშით?