აშშ-ის საკვებისა და პრეპარატების ადმინისტრაციამ (FDA) პრეპარატების, ჰიდროქსიქლოროქინის, იგივე პლაქვენილის, და ქლოროქინის COVID-19-ის გადაუდებელ სიტუაციებში სამკურნალოდ გამოყენების ნებართვა უკან გაიწვია, წერს CNN.
FDA-ის განცხადებით, გამოავლინეს, რომ ჰიდროქსიქლოროქინი, რომელსაც პრეზიდენტი ტრამპი კორონავირუსის მკურნალ პრეპარატად მიიჩნევდა და აცხადებდა, რომ მას თავადაც იღებდა, არ შეესაბამება კრიტერიუმებს სასწრაფო ავტორიზაციისთვის, რადგანაც არაა ალბათობა, რომ COVID-19-ის მკურნალობაში ეფექტიანი იქნება.
„FDA-მ ახალ და მემორანდუმში არსებულ ინფორმაციაზე დაყრდნობით დაასკვნა, რომ აღარაა შესაძლებელი დავიჯეროთ, თითქოს ჰიდროქსიქლოროქინი და ქლოროქინი კორონავირუსის მკურნალობაში ეფექტიანია. არც ისაა გონივრული, გვეგონოს, რომ ამ პრეპარატების ჩვენთვის ცნობილი და პოტენციური სარგებელი გადაწონის მათ ცნობილ და პოტენციურ რისკებს. შესაბამისად, FDA უკან იწვევს COVID-19-ის სამკურნალდ ჰიდროქსიქლოროქინის და ქლოროქინის გამოყენების სასწრაფო ნებართვას“, — წერს უწყების წამყვანი მეცნიერი დენის ჰინტონი.
თუმცა პრეპარატის გამოყენება არ არის აკრძალული სხვა შემთხვევებში და ექიმებს საჭიროებისამებრ შეეძლებათ მათი გამოწერა.
გარდა ამისა, FDA-მ გასცა გაფრთხილება, რომ ჰიდროქსიქლოროქინი და ქლოროქინი არ მისცენ პაციენტებს, ვინც რემდესივირს იღებს, რომელსაც აგრეთვე განიხილავენ, როგორც კორონავირუსის სამკურნალო პრეპარატს.
გარდა ამისა, უწყებაში ახსნეს, თუ რატომ გასცეს გადაუდებელ სიტუაციებში პრეპარატების გამოყენების ნებართვა თავის დროზე— „ეს გადაწყვეტილება დაფუძნებული იყო გადაუდებელ სიტუაციებში სამკურნალოდ გამოყენების ნებართვის კრიტერიუმებზე და იმ დროისთვის არსებულ ინფორმაციაზე. ვაკვირდებით მონაცემებს პრეპარატებთან დაკავშირებით და მომავალ გადაწყვეტილებებს მიმდინარე კლინიკური კვლევების შედეგების მიხედვით მიიღებს“, — აცხადებენ FDA-ში.
ამავე დროს, პლაქვენილის კვლევას კვლავ აგრძელებს ჯანდაცვის მსოფლიო ორგანიზაცია. მათ ცოტა ხნის წინ პრეპარატი „სოლიდარობის კვლევიდან“ ამოიღეს, ჟურნალ Lancet-ში გამოქვეყნებულ სტატიაზე დაყრდნობით, თუმცა მოგვიანებით Lancet-მა ავტორის თხოვნის საფუძველზე სტატია უკან წაიღო და „ჯანმომაც“ პლაქვენილი კვლევაში დააბრუნა.
ამავე თემაზე გირჩევთ:
