მეორე სასულიერო პირს, — რომელიც თბილისის ინფექციურ საავადმყოფოში იყო გადაყვანილი, — კორონავირუსით ინფიცირება არ დაუდასტურდა. თუმცა ერთი სასულიერი პირის ინფიცირებას ადასტურებს როგორც ბოჭორიშვილის კლინიკა, სადაც არის გადაყვანილი, ასევე, საპატრიარქო.

თბილისის ინფექციური საავადმყოფოს სამედიცინო დირექტორმა მარინა ეზუგბაიამ 14 აპრილის დილას ჟურნალისტებს განუცხადა, რომ მათ კლინიკაში გადაყვანილ მღვდელს Covid-19 არ დაუდასტურდა:

„ის, როგორც სხვა ვირუსული ინფექციით ავადმყოფი, გადაყვანილი იქნა სპეციალურ განყოფილებაში და იქ იზოლირებულად განაგრძობს მკურნალობას“, -თქვა ეზუგბაიამ. მის თანახმადვე, შესაძლოა, პაციენტი დღესვე გაეწეროს.

Covid-19-ით ინფიცირება ამ დროისთვის დაუდასტურდა, სულ მცირე, ერთ სასულიერო პირს, რომელიც თბილისში, ბოჭორიშვილის კლინიკაში მკურნალობას.

როგორც 14 აპრილს ბოჭორიშვილის კლინიკის სამეთვალყურეო საბჭოს ხელმძღვანელმა, მაკა სოლოღაშვილმა განაცხადა, სასულიერი პირი მათ კლინიკაში გუშინ, 13 აპრილს მოათავსეს ოჯახის წევრებთან ერთად.

ბოლო, 14 აპრილის დილის მონაცემებით, საქართველოში ახალი კორონავირუსით ინფიცირება 296 ადამიანს დაუდასტურდა. მათგან 68 გამოჯანმრთელდა, სამი გარდაიცვალა, დანარჩენები კი მკურნალობას აგრძელებენ.

კარანტინის რეჟიმში 4838 ადამიანია, სტაციონარული მეთვალყურეობის ქვეშ კი- 434.

მართლმადიდებელი ეკლესია, თეოლოგებისა და ჯანდაცვის სპეციალისტების ნაწილის მოწოდებისა და ვირუსის გავრცელების რისკის მიუხედავად, ამ დრომდე არ წყვეტს მსახურებას და აცხადებს, რომ მრევლი სოციალური დისტანცირების წესებს იცავს. ამასთან, სასულიერო პირები აგრძელებენ საერთო კოვზით ზიარების პრაქტიკას.

დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ 6 აპრილს მრევლს მოუწოდა, არ მივიდნენ ეკლესიაში და თითოეულმა მორწმუნემ სახლში ილოცოს, რათა „დაიცვას როგორც ეკლესია, ასევე, მთლიანად ქვეყანა“.