დიდი სლემის ხუთგზის გამარჯვებულმა, მარია შარაპოვამ Vogue და Vanity Fair-ისთვის დაწერილ სტატიაში თქვა, რომ ჩოგბურთელის კარიერას ამთავრებს. ინფორმაციას ამის შესახებ CNN ავრცელებს.
შარაპოვას ბოლო ტურნირი 2020 წლის ავსტრალიის ღია პირველობა იყო, რომლის ფარგლებშიც პირველივე რაუნდში დონა ვეკიჩმა დაამარცხა.
„მე ჩოგბურთს ცხოვრებას ვაძლევდი, ჩოგბურთმა კი მე მომცა ცხოვრება“, – წერს შარაპოვა.
შარაპოვას კარიერა 2004 წელს, 17 წლის ასაკში დაიწყო, როცა მსოფლიოს პირველი ჩოგანი სერენა უილიამსი დაამარცხა და უიმბილდონში პირველი დიდი სლემი მოიგო.
2016 წელს დადგინდა, რომ ავსტრალიის ღია პირველობაზე შარაპოვას აკრძალული ნივთიერება, მელდონიუმი ჰქონდა მიღბული. თავდაპირველად მას 2-წლიანი დისკვალიფიკაცია მისცეს, აპელაციის შემდეგ ვადა 15 თვემდე შემცირდა.
კარიერის განმავლობაში, Business Insider-ის თანახმად, შარაპოვამ საპრიზო თანხის სახით 38 მილიონი დოლარი მიიღო.
გარეკანის ფოტო: EPA
