საპროტესტო აქციის მონაწილეები, რომელთა უმეტესობა ჟურნალისტია, თბილისიდან დილის 10 საათზე დაიძრნენ და სოფელ ხურვალეთთან, სადაც ბანერია დამონტაჟებული, 11:30 საათზე ჩავიდნენ.

აქციის ორგანიზატორი ლაშა ბერულავა ამბობს, რომ აქცია დაიგეგმა სოციალურ ქსელში და მათ სურთ, რომ რუსი ჯარისკაცების მიერ საზღვრის უკანონოდ გადმოწევა გააპროტესტონ. მისი თქმით, ჟურნალისტებს, როგორც ამ ქვეყნის სხვა მოქალაქეებს, აქვთ პროტესტის გრძნობა იმის გამო, რაც ხდება კონფლიქტის ხაზთან.

მედიის წარმომადგენლებმა რუსი ჯარისკაცების დადგმულ ბანერზე დაამაგრეს მათ მიერ ჩატანილი წარწერები: “მე ვარ საქართველოდან და ჩემი ქვეყნაა ოკუპირებულია რუსეთის მიერ!”

ბესო ჩუბინიძემ და რამდენიმე ჟურნალისტმა ბანერი მოგლიჯეს, ფეხებით შედგნენ და ხევში გადააგდეს. რამდენიმე ჟურნალისტმა ბანერს ქვები დაუშინა.

ქართველმა სამხედროებმა მედიის წარმომადგენლებს მოუწოდეს, რომ ბანერი არ მოეგლიჯათ, თუმცა აქციის მონაწილეები მათ არ დაემორჩილნენ. ბესო ჩუბინიძის ვარაუდით, ამ ფაქტში მონაწილე ადამიანებს დაკითხვაზე დაიბარებენ.

11 ივლისს რუსეთის შეიარაღებულმა ძალებმა, რომლებიც საქართველოს მთავრობისა და საერთაშორისო თანამეგობრობის შეფასებით, რუსეთის საოკუპაციო რეჟიმს წარმოადგენს, გორის მუნიციპალიტეტის სოფელ წითელუბნისა და ახალგორის მუნიციპალიტეტის სოფელ ორჭოსანის მიმდებარე ტერიტორიაზე, თბილისი-გორის ცენტრალური ავტომაგისტრალის სიახლოვეს ე.წ. საზღვრის აღმნიშვნელი ბანერები აღმართეს.