საია მიიჩნევს, რომ მნიშვნელოვანია ამ და სასჯელაღსრულების დაწესებულებებში მომხდარ ყველა სხვა შემთხვევასთან დაკავშირებით, სადაც შესაძლოა იკვეთებოდეს სისხლის სამართლის დანაშაულის ნიშნები, უზრუნველყოფილ იქნეს მიუკერძოებელი და ყოველმხრივი გამოძიება. ამ მიზნით, სასურველია, გამოძიება იმთავითვე აწარმოოს არა იმ უწყებამ, სადაც ჩადენილია სავარაუდო დანაშაული (სასჯელაღსრულების სისტემა), არამედ მისგან დამოუკიდებელმა უწყებამ (პროკურატურამ), რათა სრულად გამოირიცხოს ინტერესთა კონფლიქტის რისკი.
სასჯელაღსრულების სამინისტროს ინფორმაციით, 7 ივლისს, 15:46 წუთზე სასჯელაღსრულების N8 დაწესებულებაში 1980 წელს დაბადებული ბრალდებულის გარდაცვალების ფაქტი დაფიქსირდა. პატიმარმა, რომელიც 6-კაციან საკანში იყო, წინასწარი მონაცემებით საპირფარეშოში თავი მოიკლა.
სასჯელაღსრულების სამინისტროს ინფორმაციით, გარდაცვლილი ბრალდებული თანასაკნელებმა აღმოაჩინეს.
“ფაქტზე დაწყებულია გამოძიება სსკ-ის 115-ე მუხლით. მიმდინარეობს სასამართლო – სამედიცინო ექსპერტიზა. გარდაცვალების ფაქტი ეცნობა მოცემული ბრალდებულის ოჯახის წევრებს. შემთხვევის ადგილი უკვე დაათვალიერეს სახალხო დამცველის ოფისის წარმომადგენლებმა”- ნათქვამია სასჯელაღსრულების სამინისტროს განცხადებაში.
