ღვინის ეროვნული სააგენტოს მონაცემებით, 2019 წელს საქართველოდან მსოფლიოს 53 ქვეყანაში 94 მილიონამდე ბოთლი (0.75 ლ) ღვინო გაიტანეს ექსპორტზე, რაც 2018 წლის რაოდენობას 9%-ით აღემატება და დამოუკიდებელი საქართველოს ისტორიაში ყველაზე მაღალი მაჩვენებელია. ექსპორტირებული ღვინის ღირებულება 240 მილიონ აშშ დოლარს აღწევს, რაც 2018 წლის ანალოგიურ მონაცემზე 17%-ით მეტია.
სააგენტოს ცნობით, ექსპორტი გაიზარდა ქართული ღვინის სტრატეგიულ ბაზრებზე:
- პოლონეთი – 17% (4 114 972 ბოთლი),
- ჩინეთი – 2% (7 089 259 ბოთლი),
- აშშ – 48% (678 148 ბოთლი),
- დიდი ბრიტანეთი – 60% (168 307 ბოთლი).
ზრდა აღსანიშნავია ასევე შემდეგ ქვეყნებში:
- ლიეტუვა – 45% (708 408 ბოთლი),
- გერმანია – 40% (671 453 ბოთლი),
- ბელარუსი – 74% (2 787 065 ბოთლი),
- ისრაელი – 80% (324 700 ბოთლი),
- ესტონეთი – 20% (693 248 ბოთლი),
- რუსეთი – 9% (58 384 540 ბოთლი),
- მოლდოვა – 8738% (625 724 ბოთლი), ]
- ნიდერლანდები – 17% (96 464 ბოთლი),
- ჩეხეთი – 34% (83 136 ბოთლი),
- შვედეთი – 636% (92 214 ბოთლი),
- ბულგარეთი – 30% (34 734 ბოთლი),
- მონღოლეთი – 40% (297 576 ბოთლი) და ა.შ.
2019 წელს ღვინო ექსპორტზე 341-მა კომპანიამ გაიტანა.
ამასთან, მსოფლიოს 25 ქვეყანაში ექსპორტირებულია 31.6 მილიონი ბოთლი (0.5 ლ) ბრენდი, რაც 58%-ით აღემატება 2018 წლის ანალოგიურ მაჩვენებელს. ბრენდის ექსპორტით მიღებულმა შემოსავალმა 68 მილიონი აშშ დოლარი შეადგინა (ზრდა 67%). მსოფლიოს 28 ქვეყანაში ექსპორტირებულია 625 ათასი ბოთლი (0.5 ლ) ჭაჭა, ექსპორტის ზრდამ 48% შეადგინა. ჭაჭის ექსპორტით მიღებული შემოსავალი 1.7 მლნ აშშ დოლარს აღწევს (ზრდა 38%).
როგორც სააგენტო აცხადებს, დაცული ადგილწარმოშობის ღვინოებიდან ყველაზე დიდი რაოდენობით ექსპორტირებულია „ქინძმარაული“ – 17 418 683 ბოთლი, შემდეგ მოდის: „მუკუზანი“ – 5160 309 ბოთლი, „წინანდალი“ – 4 407 563 ბოთლი , „ახაშენი“ – 1 577 823 ბოთლი , „ხვანჭკარა“ – 1 011 887 ბოთლი, „ტვიში“ – 298 509 ბოთლი და ა.შ.
მთლიანად ღვინის, ბრენდი, ჭაჭის, საბრენდე სპირტისა და ჩამოსასხმელი ბრენდის ექსპორტის შედეგად მიღებულია 345 მილიონი აშშ დოლარი, რაც 15%-ით აღემატება გასული წლის ანალოგიური პერიოდის მაჩვენებელს.
