საპენსიო სააგენტოს თავმჯდომარის ლევან სურგულაძის გადადგომასთან დაკავშირებით პრემიერ-მინისტრმა გახარიამ დღეს ჟურნალისტებთან ფინანსთა სამინისტროს ანგარიშის წარდგენისას ისაუბრა.
ჟურნალისტის კითხვაზე, თუ როგორ აისახება საპენსიო რეფორმაზე სურგულაძის გადადგომა, გახარიამ აღნიშნა, რომ სააგენტოს წესდებიდან გამომდინარე, სურგულაძე იყო “ფაქტობრივად მენეჯერი”:
“სააგენტოს ჰყავს ბორდი და კიდევ ბევრი სხვა მმართველი, ასევე ძალზედ პატივსაცემი და მაღალი რეპუტაციის მქონე ადამიანები… ადამიანმა თქვა, რომ მინდა წასვლა და ძალით ხომ არ ვამუშავებდით, თან დაგვპირდა რომ ილოცებს”, – განაცხადა გახარიამ.
გახარიას განმარტებით, საპენსიო რეფორმა არის ქვაკუთხედი, რომელიც გრძელვადიანი ვადით პრინციპულად მნიშვნელოვანია ქვეყნის ეკონომიკისთვის.
დღეს, 9 დეკემბერს გამართულ ბრიფინგზე საპენსიო სააგენტოს თავმჯდომარე ლევან სურგულაძემ განაცხადა, რომ თანამდებობიდან გადადგომის მოთხოვნით სამეთვლაყურეო საბჭოს ერთი კვირის წინ მიმართა. მისი თქმით, ის დარწმუნებულია, რომ რეფორმა წარმატებით გაგრძელდება:
“ეს რეფორმა წარმატებით გაგრძელდება, ამაში დარწმუნებული ვარ. ყოველ შემთხვევაში, მე ამის შესახებ ვილოცებ”, – განაცხადა სურგულაძემ.
სურგულაძის განმარტებით, მას “სხვა გეგმები” აქვს, რომელზეც ღიად მოგვიანებით ისაუბრებს.
სამეთვალყურეო საბჭოს გათავისუფლების თხოვნით მივმართე – სურგულაძე