პროკურატურასთან თამთა თოდაძის მხარდამჭერი აქცია იმართება [Live]

თბილისში, პროკურატურის შენობასთან თამთა თოდაძის მხარდასაჭერად აქცია იმართება, სადაც „ქართული ოცნების“  დეპუტატის, საკრებულოს წევრ ილია ჯიშკარიანის დაკავებას ითხოვენ.

თამთა თოდაძემ რამდენიმე დღის წინ “ქართული ოცნების“ დეპუტატი და საკრებულოს წევრი ილია ჯიშკარიანი სექსუალურ და ფიზიკურ ძალადობაში დაადანაშაულა. თოდაძე დეპუტატის თანამშრომელი იყო.

„ეს არ არის მხოლოდ თამთას ბრძოლა, ეს ყველა ქალის ბრძოლაა საქართველოში“, – აცხადებენ აქციის ორგანიზატორები.

უყურეთ პირდაპირ ეთერს აქციიდან:

როგორ თოდაძე ჰყვება, ილია ჯიშკარიანმა ნასვამ მდგომარეობაში მასთან სექსუალური კავშირის დამყარება სცადა, მას შემდეგ კი, რაც ქალმა წინააღმდეგობა გაუწია, დეპუტატი ფიზიკურად გაუსწორდა:

“სექსუალურად შეეცადა ჩემზე ძალადობას. როცა შევეცადე, გავქცეოდი ამ ყველაფერს, ფიზიკურად შემეხო და ფიზიკურად იძალადა. ალკოჰოლური თრობის ქვეშ, ალბათ, გადწყვიტა ჩემთან დაემყარებინა აქტი. ჩამეხუტა, კისერში რომ გიწყებს კოცნას და ფეხებს შუა შეგიყოფს ხელს… აფექტის მდგომარეობაში ვიყავი, ტელეფონი დავინახე და ვუთხარი, ბატონო ილია, ყველაფერს ვიღებ და გავასაჯაროებ-მეთქი” ,– ჰყვება ქალი ტელეკომპანია “მთავარის” ეთერში.

თოდაძე ამბობს, რომ პატრული 16:44 საათზე გამოიძახა. თუმცა, მიუხედავად ამისა, ოფისში, სადაც მისი ცნობით, ინციდენტის ამსახველი გარემო უნდა ყოფილიყო (ნამსხვრევები), პოლიცია ღამის 03:00 საათზე მივიდა, რა დროსაც ოთახი უკვე დალაგებული იყო.

თოდაძისა და მისი ადვოკატის ცნობით, ძალადობის ამსახველი ნიშნები დაზარალებულის სხეულზე იმავე დღეს დააფიქსირა სასწრაფო დახმარების ბრიგადამ, ასევე, გამომძიებელმა, რომელმაც მას ფოტოებიც გადაუღო. ამასთან, ჩატარებულია ექსპერტიზაც, რომლის
შედეგებიც ჯერ უცნობია.

თამთა თოდაძის დედა ხათუნა ოქროპირიძე კი აცხადებს, რომ მას შემდეგ, რაც მისმა შვილმა საჯაროდ ისაუბრა საკრებულოს წევრის მხრიდან მასზე განხორციელებულ ფიზიკურ და სექსუალურ ძალადობაზე, თავს უსაფრთხოდ ვერ გრძნობს.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან