დირექტორის ასარჩევად გამოცხადებული კონკურსის შეჩერებაზე სააპელაციო სასამართლოსთვის ჯერ არ მიუმართავს „აჭარის ტელევიზიის“ მრჩეველთა საბჭოს. ბორდი მოსამართლე კობა გოცირიძის გადაწყვეტილების გასაჩივრებას აპირებს, რომელსაც მოსამართლემ 23 სექტემბერს მოაწერა ხელი. ამ გადაწყვეტილებით ტელევიზიის დირექტორის შესარჩევად გამოცხადებული რიგით მეოთხე კონკურსი შეჩერებულია, ვიდრე ბათუმის საქალაქო სასამართლო საბოლოო გადაწყვეტილებას არ მიიღებს.
სასამართლოს დირექტორობის ერთ-ერთმა კანდიდატმა – გიორგი კოხრეიძემ მიმართა, რომელიც მიიჩნევს, რომ ტელევიზიის დირექტორი თვითონაა, რადგან ხუთწევრიანი ბორდიდან, 22 აგვისტოს სხდომაზე, ორის მხარდაჭერა თავად მიიღო.
მრჩეველთა საბჭოს სხდომის ოქმის მიხედვით, რომელიც „ბათუმელებს“ მრჩეველთა საბჭომ მოაწოდა, 22 აგვისტოს გამართულ სხდომას 5 მრჩევლიდან 4 ესწრებოდა. ამ ოთხიდან ერთ-ერთმა – ბეჟან გობაძემ სხდომაზე განაცხადა, რომ ის კენჭისყრაში მონაწილეობას არ მიიღებდა. კენჭისყრაში მონაწილე სამი წევრიდან ორის ხმა გიორგი კოხრეიძემ მიიღო, თუმცა ეს არ იყო „სხდომაზე დამსწრე მრჩეველთა ხმების უმრავლესობა“, რასაც „აჭარის ტელევიზიის“ რეგლამენტი ითვალისწინებს.
საზოგადოებრივი მაუწყებლის აჭარის ტელევიზიისა და რადიოს რეგლამენტის მეშვიდე მუხლის მიხედვით, „მრჩეველთა საბჭო უფლებამოსილია მიიღოს გადაწყვეტილება, თუ მის სხდომას ესწრება მრჩეველთა საბჭოს შემადგენლობის უმრავლესობა. მრჩეველთა საბჭო გადაწყვეტილებას იღებს სხდომაზე დამსწრე მრჩეველთა ხმების უმრავლესობით“.
ამონარიდი ოქმიდან, რომლის მიხედვითაც დასტურდება, რომ 22 აგვისტოს მრჩეველთა საბჭოს სხდომას ესწრებოდა არა 3, არამედ 4 წევრი. ამ სხდომაზე გიორგი კოხრეიძემ მიიღო 2 ხმა. 1 ხმა მიიღო სხვა კანდიდატმა, ბორდის ერთმა წევრმა კი კენჭისყრაში მონაწილეობა არ მიიღო. ამის მიუხედავად, ბათუმის საქალაქო სასამართლოს მოსამართლე კობა გოცირიძემ დააკმაყოფილა გიორგი კოხრეიძის შუამდგომლობა და კონკურსის შეჩერების გადაწყვეტილება მიიღო. სასამართლოს ჯერ არ გადაუწყვეტია, არის თუ არა ბორდის მიერ არჩეული დირექტორი გიორგი კოხრეიძე.
„ამ შემთხვევაში სასამართლომ უნდა შეაფასოს, ვინ იგულისხმება ამ „დამსწრე“-ში: ის, ვინც საბჭოს წევრია და სხდომას ფიზიკურად ესწრება, თუ ესწრება, როგორც უბრალოდ დაინტერესებული პირი,“ – ამბობს „ახალგაზრდა იურისტთა ასოციაციის“ იურისტი მარიამ გოგოსაშვილი.
ამავე რეგლამენტის მიხედვით, „მრჩეველს არ აქვს უფლება თავი შეიკავოს ხმის მიცემისაგან. მრჩეველი ვალდებულია განახორციელოს თავისი უფლებამოსილება, თუ იგი ესწრება სხდომას და დააფიქსიროს თავისი პოზიცია,“ – წერია „აჭარის ტელევიზიის“ რეგლამენტში.
იურისტი მარიამ გოგოსაშვილი განმარტავს, რომ იგივე რეგლამენტი პასუხისმგებლობის დაკისრებას არ ითვალისწინებს და შესაბამისად, ბეჟან გობაძეს პასუხს ვერ მოსთხოვენ იმისთვის, რომ ის სხდომას ესწრებოდა, მაგრამ კენჭისყრაში მონაწილეობაზე უარი თქვა.
„ასევე შესაძლოა, მას მიეღო მონაწილეობა კენჭისყრაში და იგივე შედეგი დამდგარიყო, თუკი იგი გადახაზავდა ყველა კანდიდატს და ბიულეტენი გაბათილდებოდა. ბიულეტენის გაბათილების შემთხვევაში, შედეგი იქნებოდა იგივე,“ – დასძენს იურისტი.
საია-ს იურისტის განმარტებით, თუკი სააპელაციო სასამართლო ბათუმის საქალაქო სასამართლოს გადაწყვეტილებას გააუქმებს, კონკურსი ჩატარდება. სააპელაციო სასამართლოს გადაწყვეტილების მისაღებად ორთვიანი ვადა აქვს. თუმცა ორი თვის შემდეგ აჭარის ტელევიზიის ბორდში ახალი შემადგენლობა იქნება – ოთხი ახალი წევრის შესარჩევად კონკურსი უმაღლესმა საბჭომ 27 აგვისტოს გამოაცხადა.
ბათუმის საქალაქო სასამართლოს 23 სექტემბრის გადაწყვეტილება ბორდის ახალი წევრების შერჩევას არ ეხება, თუმცა ახალ ბორდსაც არ ექნება ახალი დირექტორის არჩევის უფლება, თუკი სააპელაციო სასამართლო ძალაში დატოვებს მოსამართლე კობა გოცირიძის მიერ მიღებულ გადაწყვეტილებას კონკურსის შეჩერებაზე.
26 სექტემბერს, ანუ ხვალ, მთავრდება ტელევიზიის მრჩევლობის კანდიდატთა განაცხადების მიიღება. „ბათუმელების“ ინფორმაციით, გიორგი კოხრეიძე აპირებს ტელევიზიის მრჩეველთა საბჭოს კონკურსშიც მიიღოს მონაწილეობა.
აპირებთ თუ არა ტელევიზიის მრჩეველთა საბჭოს კონკურსში მონაწილეობას? – „არა მგონია“ – გვიპასუხა კითხვის პასუხად გიორგი კოხრეიძემ.
თავად აჭარის ტელევიზიამ დღეს გამოაქვეყნა ინტერვიუ ტელევიზიისა და რადიოს მრჩეველთა საბჭოს თავმჯდომარესთან. ნატა იმედაიშვილის შეფასებით, „ჩვენ წარმოვადგენთ საშიშროებას, ამიტომ შეაჩერეს კონკურსი ბოლო დღეს“.
ჯერ კიდევ აპრილში, როცა აჭარის ტელევიზიის ყოფილი დირექტორის, ნათია კაპანაძის იმპიჩმენტის პროცედურა დაიწყო, ბევრი საერთაშორისო და ადგილობრივი ორგანიზაცია, ასევე დიპლომატიური კორპუსი, გამოეხმაურა ამ ფაქტს და შეაფასა, როგორც მიუკერძოებელი ტელევიზიისთვის მაღალი რისკი.
ამავე თემაზე:
https://batumelebi.netgazeti.ge/news/225229/
