ფეისბუქი კომუნიკაციის ერთ-ერთი საუკეთესო შესაძლებლობაა – კალაძე ბახტაძის გადადგომაზე

თბილისის მერს, კახა კალაძეს მიაჩნია, რომ სავსებით ბუნებრივია, რომ მამუკა ბახტაძემ გადადგომის შესახებ განცხადება ფეისბუქის მეშვეობით გაავრცელა.

მისივე თქმით, სოციალური ქსელები კომუნიკაციის საუკეთესო საშუალებაა, რასაც თვითონაც აქტიურად იყენებს:

“ფეისბუქი კომუნიკაციის ერთ-ერთი საუკეთესო შესაძლებლობაა. თუ დააკვირდებით ჩემს საქმიანობას, ჩემი ძირითადი საკომუნიკაციო წყარო სოციალური ქსელი, კონკრეტულად კი Facebook-ია. ძალიან მჭიდრო და აქტიური ურთიერობა მაქვს საზოგადოებასთან და ფეისბუქი ამის ძალიან კარგი საშუალებაა. დღეს, 21-ე საუკუნეში აუცილებელი არ არის მხოლოდ ტელევიზიით მივაწოდოთ ინფორმაცია მოსახლეობას. არის სოციალური ქსელი, სადაც უამრავი, ასიათასობით ადამიანია ჩართული… შესაბამისად, [ფეისბუქი] საქართველოში ერთ-ერთი ყველაზე კარგი საშუალებაა საზოგადოებასთან კომუნიკაციითვის. ასევე ტვიტერი, რომელიც მსოფლიოში მიღებულია და პოლიტიკოსები აქტიურად იყენებენ. ისინი ასევე აქტიურად იყენებენ ფეისბუქს, ინსტაგრამს, ტვიტერს… რატომ არ უნდა გამოვიყენოთ, რა არის ამაში ცუდი?!”, – ამბობს კალაძე.

დღეს, 2 სექტემბერს, ყოფილი პრემიერ-მინისტრი მამუკა ბახტაძე ტექნოპარკში მხოლოდ სატელევიზიო  თოქ-შოების წამყვანებს ხვდება. მთავრობის ადმინისტრაციის ინფორმაციით, ბახტაძე ჟურნალისტებთან სამთავრობო ცვლილებებზე ისაუბრებს.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.