ბეჟან ლორთქიფანიძის გათავისუფლების მოთხოვნით სააპელაციოში პეტიციას წარადგენენ

ბეჟან ლორთქიფანიძის მხარდასაჭერად, რომელიც რამდენიმე დღის წინ დააკავეს 20 ივნისის მოვლენების საქმეზე, აქტივისტები და მოქალაქეები ხელმოწერებს სააპელაციო სასამართლოში დღეს, 31 ივლისს წარადგენენ.

ლორთქიფანიძის მხარდასაჭერად ამ დრომდე 1 800-მდე ხელმოწერაა შეგროვებული. როგორც ლორთქიფანიძის მხარდამჭერები ამბობენ, ის მაღალი სამოქალაქო შეგნების მქონე კეთილსინდისიერი ადამიანია და უკიდურესი აღკვეთის ღონისძიების შეფარდების არანაირი საჭიროება და საფუძველი არ არსებობს:

“ბეჟან ლორთქიფანიძე საზოგადოებისათვის ცნობილი პიროვნებაა, საქართველოს ბუნების მკვლევარი და ქომაგი, რომლის სახელსაც არაერთი მნიშვნელოვანი მოვლენა უკავშირდება, მათ შორის: 2003 წელს საქართველოში დიდი ხნის გადაშენებულად მიჩნეული ლეოპარდის აღმოჩენა, საქართველოში პირველად განხორციელებული დათვისა და მგლის ტელემეტრიული კვლევები; მსოფლიოში პირველად ჯიხვის სატელიტური რადიო-საყელოების მეშვეობით კვლევა და სხვა.

ბეჟანი აქტიურად მონაწილეობს საქართველოს ბუნებისდაცვითი ეროვნული სტრატეგიებისა და კანონმდებლობის შემუშავებაში, რის გამოც მას კარგად იცნობენ, როგორც გარემოს დაცვისა და სოფლის მეურნეობის სამინისტროში, ისე – საქართველოს პარლამენტში. სწორედ ბეჟანმა გადაარჩინა გარდაუვალ ლიკვიდაციას 2015 წელს დატბორილი ზოოპარკიდან გამოქცეული ყველასათვის ცნობილი და საყვარელი ბეჰემოტი, სახელად ბეგი”, – აცხადებენ პეტიციის ხელმომწერები.

ბეჟან ლორთქიფანიძე, სახეობათა კონსერვაციის სამეცნიერო-კვლევით ცენტრ „ნაკრესის“ გამგეობის წევრი და კონსერვაციის პროგრამის დირექტორი,  20-21 ივნისის ღამეს ანტისაოკუპაციო აქციაში მონაწილეობის დროს ჯგუფურ ძალადობრივ ქმედებაში ბრალდებით (სისხლის სამართლის კოდექსის 225-ე მუხლის მეორე ნაწილი)დააკავეს.

7 ივნისს კი სასამართლომ დააკმაყოფილა პროკურატურის შუამდგომლობა და მას აღმკვეთი ღონისძიების სახით წინასწარი პატიმრობა შეუფარდა.

“წინასწარი პატიმრობა ინდივიდუალური დასაბუთების გარეშე” – 20 ივნისის საქმე

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.