ელიზაბეთ რუდი, რომელიც აშშ-ის ელჩის მოვალეობას ასრულებს საქართველოში, მყივარწვერზე ადის. ინფორმაციას და შესაბამის ფოტომასალას სოციალურ ქსელში აშშ-ის საელჩო ავრცელებს.
საელჩოს თანახმად, ელიზაბეთ რუდი ინტერნეტმომხმარებლებისგან ელოდება რჩევებსა და რეკომენდაციებსაც, რა მოინახულოს ყაზბეგში.
“ამ წუთებში აშშ-ის ელჩის მოვალეობის შემსრულებელი, ელიზაბეთ რუდი მყინვარწვერზე ადის. ამ ფოტოების გამოგზავნისას გვთხოვა თქვენი რეკომენდაციები, რა მოინახულოს ყაზბეგში? მოგვწერეთ რჩევები კომენტარებში,” – წერია საელჩოს გავრცელებულ პოსტში.
პოსტს თან ახლავს ჰეშთეგიც #spendyoursummeringeorgia, რითაც რუდი უერთდება სამოქალაქო კამპანიას საქართველოში მეტი ტურისტის მოსაზიდად.
ელიზაბეთ რუდი 1 თვის წინაც შეუერთდა აღნიშნულ კამპანიას და მან ამერიკელებს მოუწოდა, ზაფხული საქართველოში გაეტარებინათ.
„ყველაზე მეტად საქართველოს ბუნებრივი სილამაზე მიყვარს. საქართველოს სუნთქვისშემკვრელ პეიზაჟებს მხოლოდ მისი ისტორიულ-კულტურული სიმდიდრე და ქართველი ხალხის სტუმართმოყვარეობა თუ შეედრება. მოდით, გაატარეთ ზაფხული საქართველოში და თავად დარწმუნდით!” – დაწერა ელიზაბეთ რუდიმ 28 ივნისს.