საერთაშორისო ჯგუფი „ვიონი“-ს წევრის, ბილაინის მხარდაჭერით, ამიერიდან, ნებისმიერ მსურველს შესაძლებლობა აქვს კომპიუტერული პროგრამირება ქართულ ენაზე ისწავლოს. შესაბამისი რესურსი განთავსებულია ონლაინ და სრულიად უფასოა. პროგრამირების გაკვეთილები გათვლილია როგორც სკოლის მოსწავლეებსა და მასწავლებლებზე, ისე სტუდენტებზე და ნებისმიერ სხვა ადამიანზე, ვისაც პროგრამირების საფუძვლების შესწვლა სურს.
პროექტი განახორციელა საგანმანათლებლო ფონდმა Educare Georgia, რომლის მიზანია მსოფლიო დონის განათლება საქართველოში მცხოვრები ნებისმიერი ადამიანისათვის ხელმისაწვდომი გახადოს. მოცემული პროექტი გულისხმობდა „ხანის აკადემიის” (Khan Academy) კომპიუტერული პროგრამირების ონლაინ გაკვეთილების გაქართულებას. „ხანის აკადემია“ მსოფლიოში ერთ-ერთი წამყვანი უფასო საგანმანათლებლო პლატფორმაა, რომელზეც წარმოდგენილია ათასობით ვიდეოგაკვეთილი და პრაქტიკული სავარჯიშო სხვადასხვა საგანში, ინგლისურ ენაზე. იმისთვის, რომ ქართველ მოსწავლეებს სრულად შეეძლოთ პლატფორმის ათვისება, Educare Georgia მის გაქართულებას და ადგილობრივ მოთხოვნებზე მორგებას ახდენს.
სადღეისოდ, პროგრამირების სპეციალისტი მსოფლიოში ყველაზე მოთხოვნადი პროფესიაა. ამასთან, ამ სპეციალობის უპირატესობა ისიც არის, რომ ადამიანს არ ჭირდება ფიზიკური დისლოკაცია და დისტანციურად შეუძლია მოემსახუროს და ემუშაოს მსოფლიოს სხვადასხვა წერტილში არსებულ დამკვეთს.
„ხანის აკადემიის“ ქართულენოვანი პლატფორმა ხელმისაწვდომია: https://ka.khanacademy.org/ და YouTube- ზე: https://bit.ly/2pmdg4K (Khan Academy Georgian).
[yellow_box]ბილაინის შესახებ[/yellow_box]
ბრენდი ბილაინი (მობილური ოპერატორი შპს „ვიონი საქართველო“) შედის კავშირგაბმულობისა და ინტერნეტით მომსახურების პროვაიდერ წამყვან საერთაშორისო ჯგუფში „ვიონი“ (VEON) რომლის სათავო ოფისი ამსტერდამში მდებარეობს. VEON-ის აქციები განთავსებულია NASDAQ-ისა (აშშ) და Euronext Amsterdam-ის ბირჟებზე. VEON-ი მის 210 მილიონ მომხმარებელზე მეტს, მსოფლიოს 10 სხვადასხვა ქვეყანაში, აწვდის ხმოვან, ფიქსირებულ, დატა და ინტერნეტის მომსახურებას. ბილაინი ქართულ ბაზარზე ფუნქციონირებს 2007 წლიდან და სადღეისოდ მის 1.3 მილიონამდე მომხმარებელს უზრუნველყოფს 2G GSM 900/1800MHz, 3G 2100 MHz და 4G/LTE 800 MHz მომსახურებით. მეტი ინფორმაციისთვის ეწვიეთ: www.beeline.ge; ინფორმაციისთვის „ვიონი“ ჯგუფის შესახებ, ეწვიეთ: www.veon.com
