მაია ფანჯიკიძე აცხადებს, რომ თუ მხარეებს შორის ეს ხელშეკრულება გაფორმდა, ანექსია იქნება:
“ეს იქნება ნამდვილი ანექსია, თუ ეს ხელშეკრულება დაიდება დე ფაქტო ხელისუფლებასთან. თვითონ აფხაზების მხრიდანაც არის სამაოდ ნეგატიური დამოკიდებულება ამ ეგრეთ წოდებული ხელშეკრულების გამო. რასაკვირველია ისინი სხვა ჭრილში განიხილავენ ამ ხელშეკრულებას, ვიდრე ჩვენ. ჩვენ მთელი საერთაშორისო თანამგობრობის სოლიდარობა გვაქვს ქვეყნის ტერიტორიული მთლიანობის და სუვერენიტეტის განხრით. ამიტომ ჩვენი მიდგომები სხვადასხვაა. თავად აფხაზებიც კი გრძნობენ, რომ ეს არის მათი უფლებების, თვითმყოფადობის და მათი შევიწროვების მცდელობა.”
ფანჯიკიძე გამოთქვამს იმედს, რომ მხარებს შორის შეიძლება ხელშეკრულება არ გაფორმდეს:
“აქედან გამომიდინარე, ვიდრე ეს ხელშეკრულება არის ასეთი ინფორმაციის დონეზე, რომ იგი გაეგზავნა დიპლომატიური არხებით აფხაზეთის დე ფაქტო ხელისუფლებას და მათ სთხოვენ შესაბამის რეაგირებას და ჯერჯერობით ოფიციალური მხარე რუსეთისა ამის თაობაზე არ იტყობინება. მინდა გამოვთქვა ამის გამო უაღრესი შეშფოთება და იმედი ამავდროს, რომ ეს ეგრეთწოდებული ხელშეკრულება არ გაფორმდება რუსეთსა და დე ფაქტო ხელისუფლებას შორის აფხაზეთში.”
რუსეთის ფედერაციასა და აფხაზეთს შორის ინტეგრაციისა და თანამშრომლობის შესახებ შეთანხმების პროექტი 13 ოქტომბერს გამოქვეყნდა.
შეთანხმება სხვადასხვა საკითხთან ერთად ითვალისწინებს აფხაზეთის საზღვრების ერთობლივად დაცვას და ერთობლივი სამხედრო შენაერთების შექმნას. შეიარაღებული აგრესიის შემთხვევაში კი, მხარეები ვალდებული იქნებიან ერთმანეთს სამხედრო დახმარება აღმოუჩინონ.
პროექტში ასევე წერია, რომ საქართველოსთან საზღვარზე კონტროლი ეტაპობრივად უნდა გამკაცრდეს, რუსეთთან კი პირიქით – ზედმეტი ბარიერები უნდა მოიხსნას.
შეთანხმება თანამშრომლობის ახალ დონეს ითვალისწინებს, ასევე, საბაჟო, ეკონომიკურ, სოციალურ, განათლებისა და ჯანდაცვის სფეროებში.
აღნიშნულ საკითხს გამოექმაურნენ საქართველოს პრეზიდენტი გიორგი მარგველშვილი, უშიშროების საბჭოს მდივანი ირინა იმერლიშვილი, შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი და ევროპულ და ევროატლანტიკურ სტრუქტრებში ინტეგრაციის საკითხებში სახელმწიფო მინისტრი ალექსი პეტრიაშვილი.
საქართველოს პრემიერ–მინისტრმა ირაკლი ღარიბაშვილმა 2014 წლის 14 ოქტომბერს მთავრობის ადმინისტრაციაში უსაფრთხოებისა და კრიზისების მართვის საბჭოს სხდომა გამართა. ამის შესახებ ინფორმაცია მთავრობის პრესსამსახურმა დღეს გაავრცელა.
