ხელშეკრულების შესაძლო შეწყვეტა ანაკლიის კონსორციუმთან – სახელმწიფომ იურიდიულ ფირმასთან კონტრაქტი გააფორმა

სსიპ ანაკლიის ღრმაწყლოვანი ნავსადგურის განვითარების სააგენტომ საერთაშორისო იურიდიულ ფირმასთან კონტრაქტი გააფორმა, რომლის ერთ-ერთი პირობაც ანაკლიის განვითარების კონსორციუმთან საინვესტიციო შეთანხმების შეწყვეტის თანმდევი შედეგების ანალიზია. დოკუმენტი 15 მარტით თარიღდება.

“დამატებითი მისია მოიცავს კლიენტისათვის ყოვლისმომცველი იურიდიული მემორანდუმის მომზადებასა და მიწოდებას, რომელშიც გაანალიზებული იქნება სამართლებრივი შედეგები საქართველოს სახელმწიფოს მხრიდან საინვესტიციო შეთანხმების შეწყვეტასთან დაკავშირებით”, – ვკითხულობთ იურიდიულ კომპანია White & Case LLP-სთან დადებულ კონტრაქტში.

ანაკლიის ღრმაწყლოვანი ნავსადგურის განვითარების სააგენტო, რომელიც ინფრასტრუქტურის სამინისტროს ექვემდებარება, ფირმისაგან ზემოაღნიშნული მემორანდუმის საწყისი ვერსიის მიწოდებას 20 სამუშაო დღის განმავლობაში ითხოვს.

კონტრაქტის სხვა მოთხოვნებიც, მოცემულის მსგავსად, ძირითადად, ანაკლიის განვითარების კონსორციუმთან სამართლებრივ ურთიერთობას შეეხება.

White & Case LLP ნიუ-იორკში დაფუძნებული იურიდიული ფირმაა, რომელიც მსოფლიოს არაერთ წერტილში, მათ შორის, აღმოსავლეთ ევროპაშიც საქმიანობს.

ხელშეკრულება სრულად იხილეთ ამ ბმულზე. 


  • ანაკლიის ღრმაწყლოვანი  საზღვაო პორტის მშენებლობას ანაკლიის განვითარების კონსორციუმი“ ახორციელებს  – სამთავრობო კომისიამ ეს გადაწყვეტილება 2016 წლის 5 თებერვალს მიიღო.
  • ანაკლიის განვითარების კონსორციუმი აერთიანებს საქართველოში დაფუძნებულ „TBC ჰოლდინგს“ , რომლის დამფუძნებელიც არის მამუკა ხაზარაძე, და  ამერიკულ საინვესტიციო ჰოლდინგს „Conti International” -ს.
  • პორტის მშენებლობისა და განვითარების ღირებულება 2.5 მილიარდი დოლარია. მშენებლობა 9 ფაზად იყოფა და, საბოლოო ჯამში, პორტის გამტარუნარიანობამ წელიწადში 100 მლნ. ტონას უნდა მიაღწიოს. პორტის პირველი ფაზა 2020-2021 წლისათვის უნდა ამოქმედდეს და პორტმა გემები უნდა მიიღოს.
  • ანაკლიის განვითარების კონსორციუმის ინფორმაციით, ამ ეტაპზე ანაკლიაში ღრმაწყლოვანი ნავსადგურის პირველი ფაზის სახმელეთო სამუშაოები მიმდინარეობს, რომელიც 2017 წლის 22 დეკემბერს დაიწყო.
  • ანაკლიის ღრმაწყლოვანი პორტისთვის შერჩეულ ტერმინალის ოპერატორთან, SSA Marine-თან “ანაკლიის განვითარების კონსორციუმმა” ხელშეკრულება 2017 წელს გააფორმა. კომპანიას ანაკლიის პორტის საკონტეინერო ტერმინალის ოპერირების უფლება 20 წლის ვადით გადაეცა.
ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან