საერთაშორისო ორგანიზაცია Freedom House-ის ახალი პუბლიკაციის (“თავისუფლება მსოფლიოში 2019“) თანახმად, საქართველოს რეიტინგი ერთი მაჩვენებლით შემცირდა და შესაძლებელი 100-დან 63 ქულა დააგროვა.

წინა წელს საქართველოს 64 ქულა ჰქონდა [0 “ყველაზე არათავისუფალს” შეესაბამება, 100 – “ყველაზე თავისუფალს”]. შარშანაც და წელსაც ქვეყანა მოხვდა “ნაწილობრივ თავისუფალი ქვეყნების” ჩამონათვალში. ჩვეულებრივ, “ფრიდომ ჰაუსი” ქვეყნებში თავისუფლების ხარისხს სამი კატეგორიით ზომავს: “თავისუფალი”, “ნაწილობრივ თავისუფალი” და “არათავისუფალი”. საქართველო უკვე წლებია სწორედ მეორე კატეგორიაში ხვდება.

ორგანიზაცია სამი დამატებითი კატეგორიით აფასებს ქვეყნებს — ზოგადად, “თავისუფლების”, პოლიტიკური უფლებებისა და სამოქალაქო უფლებების მიხედვით. წელსაც, შარშანდელის მსგავსად, პოლიტიკური უფლებების კუთხით საქართველოს 3 ქულა უწერია [1 ქულა საუკეთესოა, ხოლო 7 -ყველაზე ცუდი], სამოქალაქო უფლებებში — საქართველომ ასევე 3 ქულა მიიღო, ხოლო ქვეყნის თავისუფლების რეიტინგიც სამია.

ჯერჯერობით Freedom House-ს არ გამოუქვეყნებია სრული ანგარიში საქართველოს შესახებ, სადაც წლის განმავლობაში სხვადასხვა პრობლემური საკითხი უნდა იყოს განხილული. ორგანიზაციის მეთოდოლოგიას შეგიძლიათ აქ გაეცნოთ.