ვინ აღმოაჩინა? – იკიახა ირაკლი ღარიბაშვილმა.

მას შემდეგ, რაც “რუსთავი 2” –ის ჟურნალისტმა ნათია გოქსაძემ უთხრა, რომ ეს კადრები ტელეკომპანიაში აღმოაჩინეს, ღარიბაშვილმა განაცხადა: “რუსთავი 2″ აქტიურობს. ახალი იდეები აქვთ, იმპროვიზაციის უნარი გაქვთ. ინიცირებას იჩენთ.”

ირაკლი ღარიბაშვილმა შემდეგ ჟურნალისტებს მიმართა: “თქვენ გჯერათ? აქაც არის, მგონი, ფარული კამერები…”

საქართველოს პრემიერმინისტრმა მედიასთან მეტი კომენტარი არ გააკეთა და თურქეთის პრეზიდენთან ერთად საქართველო–თურქეთის ბიზნესფორუმზე შევიდა. 

სამაუწყებლო კომპანია “რუსთავი 2”-მა 6 მაისს, დილით საგანგებო განცხადება გაავრცელა, რომლის მიხედვითაც ტელეკომპანიის ტოპმენეჯმენტზე ფარულ აუდიოვიზუალურ თვალთვალს ახორციელებდნენ. არხის გენერალური დირექტორის ნიკა გვარამიას თქმით, რამდენიმე დღის წინ შსს-დან გამოჟონა ინფორმაციამ და მათ მიაწოდეს ვიდეომასალა, სადაც დაფიქსირებულია მისი და მისი მოადგილის – ნინო შუბლაძის აუდიოვიზუალური ჩანაწერი. მასალა მოიცავს 2 ფაილს – ერთი არის ერთსაათიანი ქრონომეტრაჟის და მეორე – 15-წუთიანი. გვარამიას თქმით, წარმოდგენილი მასალები 2013 წლის ივნისშია ჩაწერილი. მისივე განცხადებით, წყარომ, რომლის ვინაობასაც არ ამხელენ, მაგრამ აკონკრეტებენ, რომ იგი მომდინარეობს შსს-დან, ინფორმაცია მიაწოდა, რომ არსებობს 100-მდე ფაილი, რომელიც არა მხოლოდ “რუსთავი 2”-შია ჩაწერილი.

აღნიშნულ საკითხთან დაკავშირებით, პროკურატურამ დღეს გამოძიება დაიწყო. 

შეგახსენებთ, რომ არასამთავრობო ორგანიზაციები უკვე რამდენიმე თვეა აწარმოებენ კამპანიას – “ეს შენ გეხება – ისევ გვისმენენ”, რომლის ფარგლებშიც მოითხოვენ, რომ პარლამენტმა მიიღოს კანონი, რომლითაც დარეგულირდება ფარული მიყურადების სამართლებრივი საკითხები. აღნიშნული ორგანიზაციების ცნობით, შსს აგრძელებს წინა ხელისუფლების დროს დამკვიდრებულ პრაქტიკას უკანონო მოსმენებთან დაკავშირებით, რადგან ამ უწყებას აქვს შესაძლებლობა განახორციელოს სატელეფონო მოსმენები ერთდროულად 20 ათასზე მეტ აბონენტზე და ამის კონტროლის მექანიზმი ქვეყანაში არ არსებობს.

 წინა ხელისუფლების მიერ განხორციელებული უკანონო თვალთვალისა და მიყურადების შედეგად დაგროვილი მასალების ნაწილი ახალი ხელისუფლების პირობებში საჯაროდ განადგურდა. ახალმა მთავრობამ განაცხადა, რომ უარს იტყოდა ამ მანკიერ პრაქტიკაზე, თუმცა პარლამენტში უკვე თითქმის ერთი წელია წარდგენილია კანონი, რომლითაც ეს საკითხები დარეგულირდება, მაგრამ ხელისუფლება ამ კანონის მიღებას დღემდე აჭიანურებს.