კანონის მიხედვით, ყველა ნივთიერების არალეგალური ბრუნვა, რომელიც განეკუთვნება კრიმინალიზებულ ქიმიურ ნაერთთა კლასს, სამართალდარღვევას წარმოადგენს. აკრძალუალია მათი უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღება, უკანონოდ შემოტანა და, საქართველოდან უკანონოდ გატანა.

კანონის მიზანი არის ახალი ფსიქოაქტიური ნივთიერებების სწრაფად გავრცელების აღკვეთა. შინაგან საქმეთა სამინისტრო, კანონის ინიციატორი, მიიჩნევს, რომ ცალკეული ნივთიერებების კრიმინალიზაცია ვერ იქნება ეფექტიანი და მათთან ბრძოლა კოლოსალურ ფინანსურ თუ ადამიანურ რესურსს მოითხოვს.

ახლად ამოქმედებული კანონი მიჯნავს ახალ ფსიქოაქტიურ ნივთიერებებსა და ფარმაცევტული პროდუქტებსა და სპეციალურ კონტროლს დაქვემდებარებულ ნივთიერებებს ერთმანეთისგან.  

საკანონმდებლო ინიციატივის შემუშავებისას შსს-მ გაითვალისწინა ის გარემოება, რომ ბევრი ფარმაცევტული პროდუქტი სამკურნალოდ გამოიყენება და იმისათვის, რათა არ მოხდეს იმ პირების სისხლისსამართლებრივი დევნა, რომლებიც უბრალოდ მედიკამენტს მოიხმარენ.  

კანონის თანახმად, 2014 წლის 1 სექტემბრამდე ეტაპობრივად რეცეპტით გაცემას დაექვემდებარება სამკურნალო საშუალებების ყველა ფარმაკოლოგიური ჯგუფი, 9 კლასი,  რომელიც საკურნალოდ გამოიყენება.

საქართველოს შინაგან საქმეთა სამინისტრო ახალ ფსიქოაქტიურ ნივთიერებებთან ეფექტური ბრძოლისთვის საკანონმდებლო ცვლილებების პაკეტზე 2013 წლის ნოემბრდან მუშაობდა. კანონი ეფუძნება ევროპის ოთხი ქვეყნის – ავსტრიის, კვიპროსის, გაერთიანებული სამეფოს და შვეიცარიის ახლებურ მიდგომას.