საფო კობალაძე თქმით, თავის დროზე ჩვენება დიასამიძის მხრიდან თითქოსდა ტყუილის შესახებ იძულებით მისცა. კობალაძის ვერსიით, როდესაც მას მედეა ვასაძემ შეამჩნია, რომ ეშინოდა გამოძიებისთვის ცრუ ჩვენების მიცემის, „აგრესიულად განუცხადა“, რომ არ უნდა შეშინებოდა ფაქტის გაყალბების, რადგანაც საქმის პროკურორი იყო მისი ახლობელი, ხოლო ჩვენებას მას ჩამოართმევდნენ არა პროკურატურაში, არამედ თავისსავე კაბინეტში.
საფო კობალაძის თქმით, დიასამიძის ცემის ფაქტზე პროკურორმა რევაზ ჯაშმა ის მართლაც თავის კაბინეტში დაკითხა. დაკითხვის დროს პერიოდულად მასთან ოთახში შედიოდა მედეა ვასაძე.
დაკითხვის დასრულების შემდეგ პროკურორმა დაკითხვის ოქმი იმ მიზნით დატოვა, რომ სხვა გამოსაკითხ პირებსაც ამ ოქმით ეხელმძღვანელათ. საფო კობალაძემ ბრიფინგზე წარმოადგინა დაკითხვის ოქმი და თქვა, რომ სწორედ ამ ოქმით იხელმძღვანელეს უმაღლესი საბჭოს სხვა თანამშრომლებმა დაკითხვის დროს.
საფო კობალაძე ამბობს, რომ ყოველთვის გრძნობდა პასუხისმგებლობას მოქალაქე დიანა დიასამიძის წინაშე და სწორედ ამიტომ დაეძაბა მას ურთიერთობა მედეა ვასაძესთან.
დიანა დიასამიძის ცემის ფაქტის კონკრეტული დეტალების გასაჯაროებისგან საფო კობალაძემ თავს იქამდე შეიკავებს, სანამ პროკურატურას არ მისცემს ჩვენებას.
შეკითხვაზე, რატომ უნდა ენდოს საფო კობალაძის ამ განცხადებას საზოგადოება, ანუ აქვს თუ არა მას შესაბამისი მტკიცებულება, ყოფილი თანაშემწე ამბობს, რომ მტკიცებულებებს მას შემდეგ გაასაჯაროებს, როდესაც პროკურატურა ხელმეორედ დაკითხავს. ინფორმირებული წყაროს თქმით კი, საფო კობალაძეს აქვს ჩანაწერები, რომელზეც ასახულია შეხლა-შემოხლა, რაც საფო კობალაძის უმაღლესი საბჭოს შენობიდან გამოძევებას უკავშირდება.
საფო კობალაძე ამბობს, რომ მედეა ვასაძის მიერ დიასამიძის ცემის ფაქტს შეესწრო არა მხოლოდ თვითონ, არამედ მთელი უმაღლესი საბჭო, მათ შორის დაცვის თანამშრომლებიც. მისივე თქმით, პროკურორმა რევაზ ჯაშმა ამ საქმესთან დაკავშირებით არა მხოლოდ უმაღლესი საბჭოს დეპუტატები, არამედ რიგითი თანამშრომლებიც უმაღლესი საბჭოს შენობაში, მედეა ვასაძის ზედამხედველობის ქვეშ დაკითხა.
საფო კობალაძე არ ადასტურებს ფაქტს იმასთან დაკავშირებით, რომ თითქოს მედეა ვასაძემ მასაც მიაყენა ფიზიკური შეურაცხყოფა, მაგრამ ამბობს, რომ მის წინააღმდეგ მუქარის სხვადასხვა ფორმას იყენებდა.
საფო კობალაძემ ბრიფინგზე ასევე განაცხადა იმ კონტრქმედების შესახებ, რაც უმაღლესმა საბჭომ მის მიმართ გაატარა. „მას შემდეგ, რაც გაიგეს, რომ მე დიანა დიასამიძის ცემის ფაქტს ვეღარ დავიტოვებდი და საჯაროდ ვიტყოდი ყველაფერს, დაიწყეს ადმინისტრაციული წარმოება. ჩემი სამსახურიდან გათავისუფლების დოკუმენტში წერია: „სამსახურეობრივი მოვალეობის რეალური შეუსრულებლობისა და უხეში დარღვევისათვის სახელმწიფო პოლიტიკური თანამდებობის პირისა და დაწესებულების დისკრედიტაციისაკენ მიმართული უღირსი საქციელის ჩადენის გამო“.
მედეა ვასაძე ადასტურებს, რომ საფო კობალაძე ნამდვილად დიანა დიასამიძის საქმესთან დაკავშირებით გაუშვა სამსახურიდან. დეპუტატის თქმით, თანაშემწე ამ ფაქტით მის დაშანტაჟებას ცდილობდა, რაც არ აპატია.
საფო კობალაძე კი ცემის ფაქტის კონკრეტული დეტალების გასაჯაროებისგან იქამდე არ აპირებს, სანამ პროკურატურას არ მისცემს ჩვენებას.
ყოფილ საჯარო მოხელეს იმედი აქვს, რომ მისი საქმით ქვეყნის მთავარი პროკურორი დაინტერესდება.
