თავდაცვის სამინისტროს 3000-ზე მეტმა პირმა მიმართა სამსახურში აღდგენისა და დასაქმების თხოვნით

მათ შორის, 443 უფროსი ოფიცერია, 409 – უმცროსი ოფიცერი, 1 976 -კაპრალი და სერჟანტი და 495- სამოქალაქო პირი.

“დღევანდელი მდგომარეობით, მიღებული განცხადებებიდან 435 სამხედრო და სამოქალაქო პირი უკვე აღდგენილია, ხოლო 500-მდე პირი დანიშვნის პროცედურებს გადის”, – აცხადებენ სამინისტროში.

მიღებულ განცხადებებს გაერთიანებულ შტაბში შექმნილი  სპეციალური სამუშაო ჯგუფი  განიხილავს. მის შემადგენლობაში  თავდაცვის სამინისტროს სამოქალაქო ოფისისა და  გაერთიანებული შტაბის  წარმომადგენლები შედიან.

სამუშაო ჯგუფი შემოსულ განცხადებებს წოდების, დათხოვნის  საფუძვლის და ქვედანაყოფების მიხედვით ახარისხებს და მათ  დამატებით შესასწავლად  სტრუქტურულ ქვედანაყოფებს  უგზავნის. თუ განმცხადებლის  წოდება და კვალიფიკაცია შეესაბამება  სტრუქტურულ ქვედანაყოფში არსებულ ვაკანსიას, ის გადის  სამედიცინო შემოწმებას და სტრუქტურული ქვედანაყოფის დადებითი რეკომენდაციის  საფუძველზე ინიშნება შესაბამის  თანამდებობაზე.

მიმდინარე წლის 22 თებერვლიდან  სპეციალური სამუშაო ჯგუფი  შეწყვეტს აღდგენებსა და დასაქმებასთან  დაკავშირებული განცხადებების  მიღებას. ასეთ განცხადებებს მომავალში თავდაცვის მინისტრის ბრძანებით შექმნილი თანამდებობრივი საკვალიფიკაციო კომისია განიხილავს. ის ცენტრალიზებულად იმუშავებს, დასაქმების მსურველებს სპეციალურ ტესტირებას და შემოწმებას ჩაუტარებს და ამის შემდეგ მოამზადებს სარეკომენდაციო გადაწყვეტილებებს მათი დანიშვნისა თუ დანიშვნაზე უარის თქმის  შესახებ.