ახალი ამბები

მერიის დაპირებით, თბილისში, 32 ადგილას საზოგადოებრივი ტუალეტები აშენდება

26 აპრილი, 2017 • 5066
მერიის დაპირებით, თბილისში, 32 ადგილას საზოგადოებრივი ტუალეტები აშენდება

თბილისის მერია აცხადებს, რომ საზოგადოებრივი  საპირფარეშოების მოწყობისთვის თბილისში, 32 ადგილას, აუქციონს უახლოეს მომავალში გამოაცხადებს.

მერიის ცნობით, საზოგადოებრივი საპირფარეშო იფუნქციონირებს ნაღდ ანგარიშსწორებაზე, ან/და სპეციალურ ბარათებზე (მაგ. „მეტრომანი“).  საზოგადოებრივი ტუალეტის გარე ფასადი  შესაძლებელია გამოყენებულ იქნეს  ჩაშენებული ბანკომატის, გადახდის აპარატის ან  სხვა აპარატურის დასამონტაჟებლად.

მერიის ცნობით, ტუალეტებისთვის განკუთვნილი მიწის ნაკვეთები 20-წლიანი სარგებლობის უფლებით გაიცემა.

დღეს, 26 აპრილს, გავრცელებული განცხადების მიხედვით, აუქციონის პირობების თანახმად, საზოგადოებრივი  საპირფარეშო ადაპტირებული უნდა იყოს შეზღუდული შესაძლებლობების მქონე პირებისთვის, როგორც ტექნოლოგიური მოწყობილობით, ასევე- ფართით. საინფორმაციო წარწერებზე კი გათვალისწინებული უნდა იყოს ბრაილის შრიფტი.

საზოგადოებრივი ტუალეტი credit: Roberto Taddeo/all creative commons

საზოგადოებრივი ტუალეტი credit:
Roberto Taddeo/all creative commons

მერიის მოთხოვნების მიხედვით, საზოგადოებრივი საპირფარეშო  უნდა იყოს მსუბუქი ნაგებობა – საძირკვლის გარეშე, ლითონის კარკასზე აწყობილი, თანამედროვე, გარე და შიდა  მოხმარებისთვის ანტივანდალური მასალებით მოპირკეთებული.  თითოეული მათგანის მოცულობა არ უნდა აღემატებოდეს 8 მ2-ს. კონსტრუქცია, ასევე, აღჭურვილი უნდა იყოს ბავშვის გამოსაცვლელი მაგიდით, რომელიც სპეციალური, ანტიბაქტერიული მასალით იქნება დამზადებული.

მერიის განმარტებით, აუქციონში გამარჯვებული  ვალდებულებას აიღებს საზოგადოებრივი საპირფარეშოს მოვლა-პატრონობასა და სანიტარულ-ჰიგიენური პირობების დაცვაზე. მოიჯარე ასევე ვალდებული იქნება, უზრუნველყოს ცხელი ხაზის მუშაობა კვირაში 7 დღის განმავლობაში, 24-საათიანი სამუშაო რეჟიმით.

დღევანდეი მდგომარეობით, თბილისში მხოლოდ 6 მუნიციპალური ტუალეტია, რომლებიც თბილისის სკვერებში მდებრეობს.

ნახეთ: 204 200 ვიზიტორი და 6 მუნიციპალური საზოგადოებრივი საპირფარეშო თბილისში

მასალების გადაბეჭდვის წესი