ბრალდების მხარე, რომელიც პროკურორ დავით ლეპერტის სახით იყო წარმოდგენილი, აღმკვეთი ღონისძიების სახით წინასწარი პატიმრობის შეფარდებას მოითხოვდა, დაცვის მხარე კი გირაოს- 3 000 ლარის ოდენობის ან პირადი თავდებობის შეფარდებას ითხოვდა. ობოლაძეს თავდებში სასულიერო პირები უდგებოდნენ.
ადვოკატ ელისო დათუსანის განცხადებით, ობოლაძე თავად არის დაინტერესებული, საქმეზე დადგინდეს ჭეშმარიტება და იგი თავს დამნაშავედ არ ცნობს:
“ობოლაძე ერთი კაცის პატიმარია და არა მოხელე, რომელმაც უფლებამოსილებას გადაამეტა, ის არ არის ისეთი პიროვნება, რომ საზოგადოებისგან იზოლირებული იყოს და სასჯელაღსრულების დაწესებულებაში იმყოფებოდეს”.– განაცხადა ადვოკატმა.
გირაოს გადახდის ვადად 30 დღე განისაზღვრა, სასამართლო კი 5 თებერვალს გაიმართება.
შეგახსენებთ, რომ 14 დეკემბერს დასავლეთ საქართველოს საოლქო პროკურატურამ სამტრედიის პოლიციის ყოფილი უფროსი ზვიად ობოლაძე დააკავა. პროკურატურის ინფორმაციით, მან ჩაიდინა სამსახურებრივი უფლებამოსილების გადამეტება ძალადობით, რამაც ფიზიკური პირის ინტერესის არსებითი დარღვევა გამოიწვია:
“გამოძიებით დადგენილია, რომ 2012 წლის 19 აგვისტოს, დაახლოებით 12 საათისათვის, სამტრედიის რაიონული სამმართველოს უფროსი ზვიად ობოლაძე შოთა კიღურაძის ოჯახში სტუმრად მყოფი ძმისშვილის – სერგო კიღურაძის დაკავების (წვრილმანი ხულიგნობისათვის ადმინისტრაციული წესით) მიზნით მივიდა სამტრედიის რაიონის დაბა კულაშში.
სერგო კიღურაძის დაკავებას ნათესავების მხრიდან, რომელთათვის უცნობი იყო დაკავების სამართლებრივი საფუძველი, მოჰყვა პროტესტი. ოჯახის უფროსი შოთა კიღურაძე, მისი შვილი თეიმურაზ კიღურაძე და დიასახლისი მაია ახობაძე ცდილობდნენ ხელი შეეშალათ სერგო კიღურაძის ეზოდან გაყვანაში და პოლიციის მანქანაში ჩასმაში. აღნიშნულ პროცესში ზვიად ობოლაძემ, რომელსაც „პოლიციის შესახებ“ საქართველოს კანონის მე-10 და მე-11 მუხლები ანიჭებდნენ პროპორციულობისა და აუცილელობის პრინციპების გათვალისწინებით ფიზიკური იძულების გამოყენების შესაძლებლობას, გადაამეტა თავის სამსახურებრივ უფლებამოსილებას, რაც ჩაიდინა ძალადობით. კერძოდ, დაკავებული სერგო კიღურაძის პოლიციის სამსახურებრივ მანქანაში ჩასმისას ზვიად ობოლაძემ განზრახ ჩაარტყა ხელში მომარჯვებული ცეცხლსასროლი იარაღის ტარი მაია ახობაძეს სახეში. დარტყმის შედეგად მაია ახობაძემ მიიღო ნაკლებად მძიმე ხარისხის დაზიანება. მოსტყდა ქვედა ყბის კბილები და მიიღო ტვინის შერყევა”, – აღნიშნულია პროკურატურის განცხადებაში.
დანაშაული გათვალისწინებული საქართველოს სსკ-ის 333-ე მუხლის მესამე ნაწილის „ბ“ ქვეპუნქტით, რაც ითვალისწინებს ხუთიდან რვა წლამდე თავისუფლების აღკვეთას.
