ნეტგაზეთი | მშენებარე კორპუსიდან გადმოვარდნილი მუშა გარდაიცვალა მშენებარე კორპუსიდან გადმოვარდნილი მუშა გარდაიცვალა – Netgazeti

მშენებარე კორპუსიდან გადმოვარდნილი მუშა გარდაიცვალა

დღეს თბილისში, მშენებარე კორპუსიდან გადმოვარდნილი მუშა მრავლობითი დაზიანებებით რესპუბლიკური საავადმყოფოს რეანიმაციაში გარდაიცვალა. ინფორმაცია საავადმყოფოს მედიასთან და საზოგადოებასთან ურთიერთობის მენეჯერმა დაგვიდასტურა.

“სამედიცინო ტერმინით, მას ჰქონდა პოლიტრავმა – მრავლობითი ტრავმული დაზიანებები აღენიშნებოდა. დღეს საღამოს დაფიქსირდა ბიოლოგიური სიკვდილი, მიუხედავად იმისა, რომ რეამინაციული ღონისძიებები ჩატარდა და ყველაფერი გაკეთდა მისი სიცოცხლის გადასარჩენად,” – განუცხადეს ნეტგაზეთს რესპუბლიკური საავადმყოფოში.

საქართველოს შინაგან საქმეთა სამინისტროს ცნობით, საქმეზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო, ან სხვა სამუშაოს წარმოებისას უსაფრთხოების წესის დარღვევას ეხება. კოდექსის მიხედვით, ეს დანაშაული ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

ნეტგაზეთის მასალების სხვა გამოცემებში გადაბეჭდვის წესი
ავტორი
გიორგი დიასამიძე არის ნეტგაზეთის რეპორტიორი 2014 წლიდან. აშუქებს საზოგადოებრივ-პოლიტიკურ თემებს, სპორტს და სხვა მიმდინარე მოვლენებს. ასევე, მუშაობს განათლების, ადამიანის უფლებებისა და სოციალურ საკითხებზე.