ჩაშლილი სახელმწიფო გადატრიალების მცდელობის შემდეგ, პრეზიდენტ რეჯეპ ტაიპ ერდოღანის ქმედებების გასაპროტესტებლად, თურქული ოპოზიციური პარტიების ათიათასობით მხარდამჭერი შეიკრიბა სტამბულში, ტაქსიმის მოედანზე.
შეკრებილებს სიტყვით, რესპუბლიკური სახალხო პარტიის ლიდერმა კემალ კილიჩდაროღლუმ მიმართა და განაცხადა, რომ ქვეყანაში მიმდინარე მოვლენები მკვეთრად ეწინააღმდეგება დემოკრატიულ ფასეულობებს. ოპოზიციური პარტიები სახელმწიფო გადატრიალების მცდელობას გმობენ, თუმცა ეწინააღმდეგებიან ერდოღანის მიერ, გასულ კვირას გაკეთებულ განცხადებას საგანგებო ვითარებასთან დაკავშირებით, რომელიც მომავალი 3 თვის განმავლობაში იმოქმედებს. ოპოზიციის ლიდერთა თქმით, ეს პრეზიდენტს მისცემს საშუალებას თურქეთში ავტორიტარული რეჟიმი დაამყაროს.
“რესპუბლიკა და დემოკრატია” – ამ სლოგანით გაერთიანდნენ აქციაზე შეკრებილები. ეს ოპოზიციური ფრთის მიერ ორგანიზებული პირველი ფართომასშტაბიანი აქცია იყო სახელმწიფო გადატრიალების მცდელობის შემდეგ.
აღსანიშნავია, რომ აქცია ხელისუფლების მხარდამჭერი ტელევიზიიების პირდაპირ ეთერში გადაიცემოდა. Guardian-ის ინფორმაციით, აქციის ერთ-ერთი ორგანიზატორი, სწორედ მმართველი პარტია იყო; აქციაზე, როგორც ოპოზიციური პარტიის წევრები და მხარდამჭერები, ასევე ერდოღანის მომხრეებიც შეიკრიბნენ, რათა ერთობლივად დაეგმოთ სამხედრო გადატრიალების მცდელობა.
თურქეთში 15 ივლისის ღამით დაწყებულ სამხედრო გადატრიალების მცდელობას დაახლოებით 246 ადამიანის სიცოცხლე შეეწირა და 2000-მდე დაიჭრა. დაკავებულია 13000 სამხედრო პირი. გადატრიალებასთან კავშირის ბრალდებით სამსახურიდან გათავისუფლებულთა რაოდენობამ კი 60000-ს მიაღწია. მათ შორის არიან მოსამართლეები, პროკურორები, უმაღლესი სასწავლო დაწესებულებების თანმშრომლები და ჟურნალისტები.
AFP-ის ინფორმაციით, დღეს დამატებით 42 ჟურნალისტის დაკავების ორდერი გაიცა.
Turkey issues warrants for 42 journalists after coup: TV https://t.co/hagIQ1RZbF pic.twitter.com/8eq5vU1n49
— FRANCE 24 (@FRANCE24) July 25, 2016