გიორგი კვირიკაშვილთან შეხვედრის შემდეგ აუდიტორია #115-ის წევრები განცხადების სახით პრემიერთან ერთად განხილულ ძირითად საკითხებს ავრცელებენ:
- განათლების ძირეული რეფორმის საკითხი, რაც ეხება ფუნდამენტური მეცნიერებების წინ წამოწევას, გარე რეფერირების პრინიციპის დანარგვას, დაფინანსების გაზრდას და სხვა საკითხებს.
- თვითმმართველობის სტრუქტურის გაუქმებას და სტუდენტების წარმომადგენლობით საბჭოებში პირდაპირი წესით არჩევას.
- ოდეერების გამოვლენას და მათ მიერ უნივერსიტეტების დატოვებას.
- აკადემიური საბჭოსა და რექტორის არჩევის წესის დემოკრატიზაციას საკანონმდებლო დონეზე.
“პრემიერ-მინისტრი ჩვენს ყველა მოთხოვნას დაეთანხმა და მზაობა გამოთქვა აუდიტორია# 115-თან თანამშრომლობაზე. დაიდო პირობა, რომ შეიქმნება სამუშაო ჯგუფი და მთავრობა აქტიურად იმუშავებს აღნიშნულ საკითხებზე. პრემიერ-მინისტრის მხრიდან იყო შემოთავაზება კონსტიტუციაში განსაზღვრულიყო მინიმალური ზღვარის შესახებ, რომელიც მთლიანი შიდა პროდუქტიდან გამოიყოფა განათლებისა და მეცნიერებისთვის,” – აღნიშნულია განცხადებაში.
საერთო გადაწყვეტილებით, აუდიტორია #115 მე-6 კორპუსს დატოვებს მას შემდეგ, რაც პრემიერ-მინისტრი გააკეთებს ოფიციალურ განცხადებას აღნიშნულ საკითხთან დაკავშირებით.
გიორგი კვირკაშვილი სტუდენტებს დღეს შეხვდა. სტუდენტური პროტესტი 16 აპრილს განახლდა. მათ დაიკავეს თსუ-ს მე-6 კორპუსი და მოაწყვეს აქცია-მსვლელობა საქართველოს მთავრობის კანცელარიასთან.