დღეს, 15 აპრილს, თბილისში, პარლამენტის შენობასთან, 2 საპროტესტო აქცია იმართება.
პირველი აქცია დილის 10 საათიდან დაიწყება იურიდიულ საკითხთა სხდომის პარალელურად, სადაც გამჭვირვალობის საფარქვეშ განიხილავენ მედიისა და სამოქალაქო სექტორის შემზღუდავ რუსულ კანონპროექტს. აღნიშნული აქციაზე პროტესტის გამოსახატად მიდიან ის დამოუკიდებელი მედიასაშუალებები, რომელთა მუშაობასაც რუსული კანონი, მიღების შემთხვევაში, საფრთხეს შეუქმნის.
საღამოს, 19 საათზე ასევე პარლამენტის შენობასთან დაგეგმილია უფრო დიდი მასშტაბის აქცია, რათა მოქალაქეებმა გამოხატონ პროტესტი რუსული კანონის წინააღმდეგ.
მნიშვნელოვანია ის გარემოებაც, რომ საქართველოს პარლამენტში დღეისათვის გამოაცხადეს უსაფრთხოების ე.წ. ყვითელი დონე, რაც გულისხმობს საკანონმდებლო ორგანოში შესვლის შეზღუდვას.
დაგეგმილ საპარლამენტო ღონისძიებებზე, მათ შორის, კომიტეტის სხდომებზე, დღეს დაიშვებიან მხოლოდ შესაბამისი სტრუქტურული ერთეულების მიერ მოწვეული პირები. შეზღუდვა არ შეეხება მხოლოდ ტელემაუწყებლების/ტელემედია საშუალებების აკრედიტებულ ჟურნალისტებს. როგორც პარლამენტის პრესცენტრში აცხადებენ, ონლაინ მედიასაშუალებების აკრედიტებული ჟურნალისტები შენობაში ვერ შევლენ.
გარდა ამისა, შენობაში შეშვებულ ტელევიზიების ჟურნალისტებს არ აძლევენ საშუალებას, დაესწრონ და გააშუქონ იურიდიულ საკითხთა კომიტეტის სხდომა. შესაბამისად, საზოგადოებისთვის აღნიშნული პროცესისთვის თვალყურის მიდევნების ერთადერთი საშუალება არის ოფიციალური სატელევიზიო სიგნალი პარლამენტიდან, რომელსაც, როგორც წესი, დარბაზში ვითარების გამწვავების შემთხვევაში ან ხმას უთიშავენ, ან საერთოდ წყვეტენ მაუწყებლობას.
კითხვაზე, რის გამო აეკრძალა ონლაინ მედიას პარლამენტში შესვლა, საკანონმდებლო ორგანოს პრესსამსახურის წარმომადგენელმა თამარ ჯანელიძემ თქვა, რომ ამის მიზეზია მედიის წარმომადგენლების მიერ აღნიშნული კანონის გაპროტესტება.
აქედან გამომდინარე, ნეტგაზეთი, ისევე, როგორც არაერთი სხვა დამოუკიდებელი მედიასაშუალება, დღეს საკანონმდებლო ორგანოში მუშაობას ვერ შეძლებს.
- რა ხდება
მმართველმა პარტიამ მიცემული პირობა დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტს ისევ აბრუნებს. „ქართული ოცნების” მიერ 3 აპრილს დარეგისტრირებულ კანონპროექტში „უცხოური გავლენის გამჭვირვალობის შესახებ“, გასულ წელს „ხალხის ძალის“ მიერ ინიციირებული და საპარლამენტო უმრავლესობის 76 დეპუტატის მხარდაჭერილი კანონისგან განსხვავებით, ტერმინი „უცხოური გავლენის აგენტი“ ჩანაცვლებულია „უცხოური ძალის ინტერესების გამტარებლით“.
კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის” სტატუსებს მიანიჭებს.
საქართველოს საერთაშორისო პარტნიორებმა, აშშ-ის, ევროკავშირისა და ევროპის საბჭოს ჩათვლით, შეშფოთება გამოთქვეს საქართველოს ხელისუფლების მიერ შარშან „უპირობოდ“ გაწვეული კანონპროექტის ხელახალი ინიციირების გამო. დასავლელი პარტნიორები საქართველოს მოუწოდებენ, უარი თქვას აღნიშნული კანონის მიღებაზე, რადგან ის ხელს შეუშლის საქართველოს ევროპულ პერსპექტივას.
მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლეთისგან.
