აქონდროპლაზიის მქონე ბავშვების მშობლები მორიგ საპროტესტო აქციას ატარებენ. ამჟამად ისინი თბილისში, რუსთაველის გამზირზე იმყოფებიან, მოგვიანებით კი კვლავ მთავრობის კანცელარიასთან გეგმავენ დაბრუნებას.

როგორც აქციის ერთ-ერთი მონაწილე ამბობს, მშობლები სახელმწიფოს დახმარების გარეშე შვილებისთვის აუცილებელი წამლის ყიდვას ვერ შეძლებენ და აღნიშნავს, რომ ექიმებს წამლის მიერ გამოწვეული გვერდითი მოვლენები პრობლემად არ მიაჩნიათ:

„სხვა გამოსავალი არ გვაქვს. იმდენად ძვირია წამალი, არავის შეგვიძლია [ყიდვა]. თუკი სახელმწიფო პროგრამა არ შედგა, სხვანაირად არ გამოვა… კვლევა დასრულებულია ორი წელია, გვეუბნებიან, რომ არ არის… ექიმებიც ჩვენ მოვიყვანეთ – გვერდითი მოვლენები ყველაფერს აქვს და ამ წამალსაც, მაგრამ ექიმების ხელმოწერებია, რომ მოუვლიან გვერდით მოვლენებს და არ არის პრობლემა“, – უთხრა „ფორმულას“ აქციის ერთ-ერთმა მონაწილემ.

ეკა ჭონქაძემ, თავის მხრივ, უპასუხა პრემიერის განცხადებას, რომ წამალი ჯერ კიდევ არ არის ბოლომდე გამოცდილი:

„არ ვყვებით პოლიტიკურ მცდელობებს. იმდენი ხანი ვითხოვდით პრემიერთან, პარლამენტთან შეხვედრას… რომელიმე მოვიდა? ცივ მიწაზე რომ ვისხედით, რომელიმე მოვიდა?! არც მოგვხედეს, დაგვცინოდნენ! წამალი უნდა იყოს ბავშვებისთვის, მე არ წავალ ნიკოლოზთან ხელცარიელი. სულელი ვარ, ჩემი შვილი ექსპერიმენტად [ვაქციო]?!“, – თქვა მან „ფორმულასთან“.

უკვე რამდენიმე თვეა, რაც მშობლები აქტიური საპროტესტო აქციებით ითხოვენ აქონდროპლაზიის მქონე ბავშვებისთვის აუცილებელ პრეპარატს. სახელმწიფო ამ მოთხოვნას ჯერჯერობით არ აკმაყოფილებს. მშობლები თითქმის 1 კვირაა, რაც მთავრობის შენობასთან ათენებენ.

ამ თემაზე წაიკითხეთ:

• აქონდროპლაზიის მქონე ლაზარეს მიმართვა ხელისუფალთ [ვიდეო]
• აქცია/მსვლელობა აქონდროპლაზიის წამლის მოთხოვნით [ფოტო/ვიდეო]

გარეკანის ფოტო: სალომე ბარკერის ფეისბუქ-გვერდიდან