თბილისში, ვაკის რაიონში, ნაფეტვრებისკენ მიმავალ გზაზე სპორტულ-გამაჯანსაღებელი კომპლექსი და საცხოვრებელი კორპუსი უნდა აშენდეს, თუმცა აღნიშნული ტერიტორია თბილისის მერიამ აუქციონზე თავდაპირველად მხოლოდ სპორტულ-საგანმანათლებლო კომპლექსის აშენების ვალდებულებით, იაფად გაყიდა.

თუმცა რამდენიმე წელიწადში შეიცვალა გიორგი დანელიას #12-ში მდებარე ფართის თავდაპირველი მფლობელი და მასთან ერთად შეიცვალა პროექტის შინაარსიც – სპორტულ-საგანმანათლებლო კომპლექსის ნაცვლად, ახლა აქ სპორტულ-გამაჯანსაღებელი კომპლექსისა და საცხოვრებელი კორპუსის აშენება იგეგმება.

როგორც საკრებულოს წევრი “ნაციონალური მოძრაობიდან”, ირაკლი ნადირაძე ამბობს, უწყებამ 7 ოქტომბერს მიიღო გადაწყვეტილება და მიწის ახალ მფლობელს, სპორტულ კომპლექსთან ერთად, საცხოვრებელი კორპუსის აშენების უფლებაც მისცა, თუმცა კომპანიამ ბინების გაყიდვა ამ უფლების მიღებამდე დაიწყო.

ირაკლი ნადირაძე ამ ადგილას საცხოვრებელი კორპუსის აშენებას აპროტესტებს, რადგან ტერიტორია მცირე თანხად სულ სხვა ვალდებულებით გაიყიდა, ახლა კი საცხოვრებელ კორპუსს აშენებს კომპანია, რომლის მფლობელიც არის თბილისის მერის, კახა კალაძის ოჯახის ახლობელი.

რას ედავება დეპუტატი მერიას და კომპანიას

ვაკის რაიონში 9695 კვ.მ ფართობის ტერიტორია თბილისის მერიამ აუქციონის გზით 2017 წელს 358 600 ლარად გაყიდა შემდეგი პირობით: მიწის ნაკვეთზე უნდა აშენებულიყო სპორტულ-საგანმანათლებლო კომპლექსი.

ირაკლი ნადირაძის თქმით,  საკრებულოს 7 ოქტომბრის გადაწყვეტილებით, სპორტსმენებზე მორგებული კამპუსის ნაცვლად ახლა აქ საცხოვრებელი კორპუსი აშენდება. რაც შეეხება თავდაპირველ პროექტს, მისი თქმით, თავისი შინაარსით კომპლექსი გათვლილი იყო სპორტსმენებზე, რომლებიც შეძლებდნენ ვარჯიშს, შემდეგ კი- შესაბამის კამპუსში დარჩენას, რასაც ასევე აღნიშნული კომპლექსი უზრუნველყოფდა.

“თეთრი კვადრატის” პროექტი “ფილიგრინი”. ფოტო: “თეთრი კვადრატის” ვებგვერდი

“თეთრი კვადრატის” პროექტი “ფილიგრინი”. ფოტო: “თეთრი კვადრატის” ვებგვერდი

ნადირაძე აღნიშნავს, რომ პროექტი დამტკიცებული იყო და არსებობდა გარკვეული მონახაზიც, ასევე ჩატარებული იყო წინასაპროექტო კვლევები.

თუმცა ახლა მისი შინაარსი შეიცვალა და კომპანიამ საცხოვრებელი ბინების გაყიდვა დაიწყო ისე, რომ საკრებულოს საბოლოო გადაწყვეტილებას არ დალოდებია. იმის გადამოწმება, რომ ჯერ არაშენებულ კორპუსში ბინები ნამდვილად იყიდებოდა, ნეტგაზეთმაც შეძლო დამოუკდებლად.

“ახლა ეს ტერიტორია ანუკი არეშიძის [კახა კალაძის მეუღლე] მეგობრის ქმრის კომპანიის საკუთრებაა, რომელმაც ადმინისტრაციული კორპუსის და სპორტულ-საგანმანათლებლო კომპლექსის ნაცვლად საცხოვრებელი კორპუსის ჩადგმა მოინდომა. და მარტო კი არ მოინდომა, უკვე დაიწყო გაყიდვები. ანუ საკრებულოს ჯერ არ ჰქონდა მიღებული გადაწყვეტილება და უკვე ყიდდნენ ბინებს. ეს მეტყველებს იმაზე, თუ რამდენად არაფრად აგდებენ საკრებულოს, მერიას და ხალხს – მხოლოდ იმიტომ, რომ კახი კალაძის მთელი ოჯახი ჩართულია ბიზნესში”, – ამბობს ის.

ნადირაძის თქმით, საკრებულოს გადაწყვეტილებამდე ბინების გაყიდვა მიუთითებს, რომ კომპანიამ წინასწარ იცოდა, რა გადაწყვეტილებას მიიღებდა საკრებულო.

ირაკლი ნადირაძე. ფოტო: საზოგადოებრივი მაუწყებელი

ვინ არის შოთა ბერიკაშვილი და რატომ მიიჩნევს ნადირაძე, რომ თბილისის მერი “მფარველობს” მას

შოთა ბერეკაშვილი, რომელიც რუსეთ-საქართველოს ორმაგი მოქალაქეობის მქონეა, ამჟამად სააქციო საზოგადოება „ნიუ დეველოპმენტის“ გენერალური დირექტორი და „ბიქეი ჰოლდინგში“ შემავალი დეველოპერული კომპანია „თეთრი კვადრატის“ მმართველი პარტნიორია. მანამდე, 2019 წლამდე, ის იყო „ბკ ქონსთრაქშენის“ დირექტორი.

მისი მეუღლე მაკა კვიციანია, ცოლისდა კი -„ქართული ოცნების“ დეპუტატი ხათუნა (ბაია) კვიციანი.

ერთმანეთთან ახლო ნაცნობობა აქვთ ასევე კახა კალაძის მეუღლეს, დიზაინერ ანუკა არეშიძესა და შოთა ბერეკაშვილის მეუღლეს — ასევე დიზაინერ მაკა კვიციანს.

რაც შეეხება შოთა ბერეკაშვილისა და კახა კალაძის კავშირებს, გასულ წელს თბილისის მერმა ტელეკომპანია “მთავარის” მიერ დასმულ კითხვაზე განაცხადა, რომ “ძალიან ბევრ ადამიანს იცნობს” და იცნობს “ბატონ შოთასაც”.

შოთა ბერეკაშვილი. ფოტო: M2

ნადირაძე მიიჩნევს, რომ სწორედ ამ კავშირის საფუძველზე მიეცემა შესაძლებლობა კომპანია “თეთრ კვადრატს”, რომ ვაკის რაიონში საცხოვრებელი კორპუსი ააშენოს მინიმალური ხარჯებით, რადგან მიწის ნაკვეთი სხვა მიზნით, მიზერულ თანხად არის გაყიდული. თეთრი კვადრატი ზემოხსენებული ტერიტორიის ახალი მფლობელია, თუმცა აუქციონი სპორტულ-საგანმანათლებლო კომპლექსის ასაშენებლად თავადპირველდ სხვამ მოიგო.

ნადირაძის განმარტებით, რადგან თავდაპირველად ამ ტერიტორიაზე კორპუსის მშენებლობა არ იგეგმებოდა, მიწის ნაკვეთის ერთი კვ.მ. გაიყიდა 37 ლარად, როცა საცხოვრებელი დანიშნულებით გაყიდვის შემთხვევაში, მისი ფასი გაცილებით მაღალი იქნებოდა.

“ეს თანხები ფაქტობრივად მოაკლდა სოციალურ, ეკონომიკურ, ინფრასტრუქტურულ პროექტებს. ასეთი განსახორციელებელი პროექტები კი ბევრია დედაქალაქში”, – აცხადებს ის.

საერთო საცხოვრებლის რენდერი. ფოტო: tas.ge/2022 წლის მაისი

საერთო საცხოვრებლის რენდერი. ფოტო: tas.ge/2022 წლის მაისი

მიუხედავად იმისა, რომ ტერიტორია თავდაპირველად განსხვავებული ვალდებულებით გაიყიდა, პროექტზე ვალდებულების მოხსნა და სტატუსის შეცვლა შესაძლებელია კანონიერად, საკრებულოს გადაწყვეტილების საფუძველზე, რის შემდეგაც კომპანიამ უნდა აანაზღაუროს სხვაობა თანხებში, რომელსაც ექსპერტიზა დაადგენს, თუ რამდენით მეტი ეღირებოდა მიწა,  საცხოვრებლის დანიშნულებით რომ გაყიდულიყო.

ნადირაძის განმარტებით, როდესაც დედაქალაქმა აღნიშნული ტერიტორია სპორტულ-საგანმანათლებლო ფუნქციით გაყიდა, მას ჰქონდა რეკრეაციული ზონა 3-ის სტატუსი.

ახლა კი აღნიშნულ ტერიტორიას შეეცვალა ფუნქციური ზონის სტატუსი და რეკრეაციული ზონა 3-ის ნაცვლად საცხოვრებელ ზონად გადაკეთდა, რომლის ღირებულებაც უფრო მაღალია, ვიდრე რეკრეაციული ზონა 3-ის, რადგან სხვა დატვირთვას იძენს ქალაქისთვის. მიუხედავად იმისა, რომ კომპანიას აღნიშნული თანხის ანაზღაურების ვალდებულება აქვს, ნადირაძე სკეპტიკურად უყურებს ამ პროცესს, რადგან არ ენდობა სტრუქტურებს, რომლებმაც ამ სხვაობის თანხა უნდა დაადგინონ:

“ის, რომ ვალდებულება იცვლება და განსხვავებას გადაახდევინებენ, არაფერია. ეს განსხვავებაც სამხარაულის ექსპერტიზამ უნდა დაადგინოს, რომელსაც რასაც უნდა იმას აწერინებენ. რაღაც სიმბოლური თანხა შეიძლება ჩაარიცხინონ, რაც ზღვაში წვეთი იქნება”, – ამბობს ნადირაძე.

ნადირაძის თქმით, იმ შემთხვევაში, თუ მიწის თავდაპირველი მფლობელი დაკისრებულ ვალდებულებას ვერ შეასრულებდა და სპორტულ-საგანმანათლებლო კომპლექსს ვერ ააშენებდა, მერიას აღნიშნული ქონება უნდა ჩამოერთმია მისთვის და დაეჯარიმებინა. ხოლო ამის შემდეგ, თუ თბილისის ურბანული და არქიტექტურული სამსახურები ჩათვლიდნენ, რომ ამ ტერიტორიის განვითარება საცხოვრებელ ზონად იქნებოდა შესაძლებელი, ამ ფუნქციური ზონით უნდა გაეტანა ხელახლა აუქციონზე და ბევრად უფრო ძვირად გაეყიდა, ხოლო თანხა მიემართა მუნიციპალიტეტში სხვადასხვა პრობლემის აღმოსაფხვრელად.

“მერიის სწორი პოზიცია და მიდგომა იქნებოდა ეს. თუ კომპანია არ ასრულებს თავის ვალდებულებას, უნდა ჩამოართვა ეს ქონება და მიმართო ისე, როგორც ქალაქს სჭირდება”, – ამბობს ის ნეტგაზეთთან.

ნადირაძე ასევე აღნიშნავს, რომ სტატუსის ცვლილებაზე საკრებულოს დადებითი გადაწყვეტილების შემდეგ, ოპოზიცია გეგმავს, რომ საგამოძიებო ორგანოებს და სასამართლოს მიმართოს და შესაბამისი განკარგულების მსვლელობის შეჩერება მოითხოვოს.

რას ამბობს მერია და მშენებელი კომპანია

კომპანია “თეთრ კვადრატში” და თბილისის მერიაში აცხადებენ, რომ აღნიშნულ ტერიტორიაზე სპორტული კომპლექსის აშენება კვლავ იგეგმება.

კომპანიის პრესსამსახურში ამბობენ, რომ ფუნქციურად არ იცვლება თავდაპირველი პროექტი და ტერიტორიაზე სპორტულ-გამაჯანსაღებელი კომპლექსი მოეწყობა, რომელიც მოიცავს ჩოგბურთის მოედანს, რამდენიმე სპორტულ მოედანს, საცურაო აუზსა და კომპლექსის მენეჯმენტისთვის ადმინისტრაციის შენობას.

მათი თქმით, ეს არ იქნება საცხოვრებელთან ინტეგრირებული დაცული ტერიტორია, რომლითაც გარეშე პირები ვერ ისარგებლებენ, არამედ იქნება დამოუკიდებელი სპორტულ-გამაჯანსაღებელი კომპლექსი და ისევ “მათზე იქნება გათვლილი, ვისზეც იყო ადრე, უფრო გაუმჯობესებული პირობებით”.

რაც შეეხება საკრებულოს გადაწყვეტილებამდე ბინების გაყიდვას, კომპანიაში აცხადებენ, რომ 2022 წლის ივლისში საერთო საცხოვრებლის მშენებლობასთან დაკავშირებით თბილისის არქიტექტურის სამსახურმა ნებართვა გასცა. მათი თქმით, აღნიშნული საერთო საცხოვრებელიც კომერციული დანიშნულების უნდა ყოფილიყო, სადაც გაქირავდებოდა და გაიყიდებოდა ფართები.

“ზუსტად იგივე კომერციული დანიშნულებისაა, ოდნავ სხვა სტატუსი ექნება. მოცულობა იგივეა, K2 კოფიციენტი არ იზრდება [მიწის ნაკვეთზე განთავსებული კაპიტალური შენობა-ნაგებობების სართულების ჯამური ფართობის შეფარდება მიწის ნაკვეთის ფართობთან]. ტექნიკურად არაფერი შეიცვლება არც საცხოვრებელთან დაკავშირებით, სტატუსის გარდა”, – აცხადებენ კომპანიის პრესსამსახურში.

რაც შეეხება თბილისის მერიას, ნეტგაზეთი უწყებას დაუკავშირდა 7 ოქტომბერს, საკრებულოს გადაწყვეტილების მიღებამდე. უწყებაში ადასტურებდნენ, რომ საცხოვრებელი კორპუსის მშენებლობასთან დაკავშირებით ნებართვა გაცემული არ იყო, თუმცა ამბობდნენ, რომ სპორტულ კომპლექსთან ერთად შესაძლებელი იქნება ერთი საცხოვრებელი შენობის განთავსებაც, რაც ტერიტორიის გეგმარებას “სრულიად შეესაბამება”:

“რამდენიმე წლის წინ მოხდა ტერიტორიის გასხვისება, თუმცა ნაფეტვრებისკენ მიმავალ გზაზე დღეს რამდენიმე მნიშვნელოვანი საცხოვრებელი პროექტი ხორციელდება.
მუნიციპალიტეტმა ასევე მოახდინა გზის გაფართოება და საპარკინგე ადგილების მოწესრიგება, რამაც ტერიტორია არსებითად გააჯანსაღა და შესაძლებელი გახადა საცხოვრებელი ფუნქციების განვითარება.

კონკრეტულად ამ ობიექტს რაც შეეხება, მასზე სპორტული კომპლექსი კვლავ მოეწყობა, თუმცა შესაძლებელი იქნება ასევე ერთი საცხოვრებელი შენობის განთავსება, რაც სრულიად შეესაბამება დღეისათვის ამ გზაზე არსებულ გეგმარებას”, – ნათქვამია ნეტგაზეთისთვის მიწოდებულ მერიის წერილში.

რაც შეეხება ვალდებულების პირობის ცვლილების შემდეგ თანხობრივ სხვაობას, თბილისის მერიის თქმით, აღნიშნული სხვაობის გადახდა კომპანიას მოუწევს. სხვაობის თანხა კი საკრებულოს გადაწყვეტილების შემდეგ უნდა დაითვალონ.

კომპანია “თეთრ კვადრატში” კი ამბობენ, რომ სხვაობას დაფარავს ტერიტორიის წინა მფლობელი.

იქნება ტერიტორია გათვლილი მასზე, ვისზეც ადრე იყო?

ირაკლი ნადირაძის თქმით, სიმართლეს არ შეესაბამება კომპანიის პოზიცია, რომ ფუნქციურად არ იცვლება თავდაპირველი პროექტი, რადგან თავდაპირველად ეს სივრცე სრულად იყო გათვლილი სპორტსმენებზე, რომელთათვისაც მარტივი და მოსახერხებელი იქნებოდა სპორტულ კომპლექსში ვარჯიში, შემდეგ კი, მაგალითად, რეგიონიდან ჩამოსული სპორტსმენები დარჩებოდნენ იქვე და აღარ მოუწევდათ ღამის გასათევად სხვა ადგილის მოძიება:

“ეს კომპლექსი იყო საგანმანათლებლო ფუქნციით დატვირთული და ჩამოსული მწვრთნელები, მსაჯები, სპორტსმენები იქვე იცხოვრებდნენ. ახლა, როცა კორპუსად გადაკეთდება, ვეღარ იქნება ერთიანი სივრცე. ანუ ეს ფუნქცია ეცლება კომპლექსს.

თუ სპორტული კოპლექსის ფარგლებში ეს შენობა [კორპუსი] ისედაც იყო გათვალისწინებული, ეს უნდა ყოფილიყო კამპუსი ან ადმინისტრაციული შენობა, სადაც სპორტსმენები რომ ჩამოვიდოდნენ შეკრებაზე, მათ შორის რეგიონებიდან, სპორტული აქტივობების შემდეგ იქვე ბაზაში დაისვენებდნენ. ანუ უნდა ყოფილიყო ერთიანი სპორტული კომპლექსი.

ახლა, როდესაც ამ კორპუსში ბინები გაიყიდება საცხოვრებლად, სავარჯიშოდ ან კვალიფიკაციის ასამაღლებლად ჩამოსული სპორტსმენი ამ ბინებში როგორ მოხვდებიან?!”, – განმარტავს ნადირაძე.

მისი თქმით, ცვლილების შემდეგ კომპლექსი არა სპორტსმენებისთვის, არამედ იქ მცხოვრები ადამიანებისთვის იქნება ხელსაყრელი, რადგან იქვე ექნებათ სპორტული სივრცე, რაც ბინების ფასს გაზრდის, საბოლოოდ კი მოგებაში დარჩება კომპანია.

ამასთან, მისი თქმით, ახალი მოდელი კომპანიას  მეტ ფინანსურ სარგებელს მოუტანს სხვა მხრივაც.

კერძოდ, ნადირაძის განმარტებით, იმ შემთხვევაში, თუ კამპუსი თავიდანვე კომერციული ფუნქციით იყო ჩაფიქრებული, კომპლექსის მშენებლობაზე დახარჯული თანხის ამოღებას და შემდეგ ფინანსური მოგების ნახვას მშენებელი კომპანია წლების შემდეგ შეძლებდა, ახლა კი ამ თანხას ერთიანად ამოიღებს და მეტ მოგებასაც ნახავს:

“თუ თავისივე ფულით უნდა აეშენებინა სპორტული კომპლექსი და შემდეგ იქ უნდა გაექირავებინათ ბინები და აბონიმენტებიდან ამოეღოთ ეს თანხა, ამგვარად, დახარჯული ფულის ამოსაღებად და მოგებაზე გასასვლელად შეიძლება 10-20 წელი დასჭირვებოდა.

ამ შეთხვევაში კი ერთიანად ყიდიან ბინებს და ერთიანად იღებენ ფულს. უკვე ყიდიან ბინებს და ერთიანად ნახულობენ 3-4-ჯერ მეტ მოგებას, ვიდრე 10 წლის განმავლობაში ნახავდნენ”, – განმარტავს ის.

ფოტო: tas.ge. 2022 წლის ივლისი

კომპანია “თეთრი კვადრატის” მიერ საიტზე აღნიშნული პროექტის აღწერაში ვკითხულობთ, რომ “ფილიგრინი” 6-სართულიანი და 60-ბინიანი კორპუსი იქნება. საცხოვრებელი ბინების ფართობი კი 67 კვ. მ.-დან დაიწყება.

რაც შეეხება ბინების ფასებს, ნეტგაზეთის ინფორმაციით, კომპანიაში კლიენტებს ეუბნებიან, რომ პირველი 5 ბინის (თეთრი კარკასი) კვ. მ.-ის მინიმალური ფასი 1039$-დან 1204$-მდე იქნება. 7 ოქტომბრის მდგომარეობით, ამ ფასად გაყიდული იყო უკვე 2 ბინა. 5 ბინის გაყიდვის შემდეგ კი კვ.მ-ის ფასები 1100$-დან 1276$-მდე იქნება.