2 წლის თუთამ ლეიკემიასთან ბრძოლის ძირითადი ეტაპი წარმატებით დაასრულა

2 წლის თუთას მკურნალობის ძირითადი ეტაპი დასრულებულია. გოგონამ, რომელიც ლიმფობლასტურ ლეიკემიას  საზოგადოებრივი  საქველმოქმედო კამპანიის ფონზე, 10 თვის განმავლობაში ებრძოდა, ყველა ძირითადი სირთულე წარმატებით გადალახა და თავს უკეთ გრძნობს.

თუთა დედასთან ერთად ამ დრომდე გერმანიის იმ კლინიკაში რჩება, სადაც მკურნალობის კურსი დაიწყო, თუმცა საქართველოში მალე დაბრუნდება. ქიმიოთერაპიის ოთხი ბლოკი გაიარა, ბოლო გადასხმა კი ექიმებმა 12 სექტემბერს ჩაუტარეს. გოგონას მამის, ანთიმოზ ცქიტიშვილის თქმით, ამით მკურნალობის ძირითადი პროცედურა დასრულდა.

“ფაქტობრივად, მკურნალობა დასრულდა. გუშინწინ ამოუღეს კათეტერი ბოლოს. თუმცა, კიდევ უნდა გააგრძელოს მედიკამენტების მიღება წელიწად-ნახევარი, ოღონდ ეს უკვე საქართველოში და უნდა წავიდეს დაკვირვების პროცესი. თვეში ერთხელ უნდა ვაგზავნოთ ანალიზები კლინიკაში, სადაც უმკურნალეს. თვითონ კარგად გრძნობს თავს, მოღონიერდა და ყველა გართულება ჩაუცხრა. ახლა მთავარია, არ გაუმეორდეს და კლინიკაში იძლევიან 90%-იან გარანტიას, რომ ეს არ მოხდება”, – უთხრა ანთიმოზმა “ნეტგაზეთს”.

როგორც თუთას დედა ანკა ბერიშვილი კლინიკის მთავარ ექიმზე დაყრდნობით ამბობს, მკურნალობის პროცესში თუთას ყველა შესაძლო გვერდითი მოვლენა დაუფიქსირდა, რამაც პროცედურა გააჭიაანურა.

“ძირითადად იმყოფებოდა სტაციონარში, მუდმივი დაკვირვებისა და სხვადასხვა მედიკამენტების ქვეშ, მაგრამ ამ უზარმაზარი სიყვარულით, რაც თქვენ აჩუქეთ, თუთა მზადაა გადავიდეს ცხოვრების ახალ, უკეთეს ეტაპზე!”, – წერს ის.

თუთას ლიმფობლასტური ლეიკემია მიმდინარე წლის იანვარში დაუდგინეს. დიაგნოზი რთული და მოულოდნელი იყო, თუმცა გოგონა და მისი ოჯახის წევები  დაავადებასთან ბრძოლის პროცესში მარტო არ ყოფილან: ახლობლების მიერ დაწყებულმა საქველმოქმედო კამპანიამ სულ რამდენიმე დღეში უამრავი ადამიანი გააერთიანა. მის დასახმარებლად შეიქმნა ფეისბუქ ჯგუფი და ვებგვერდი, პარალელურად კი რიგი საქველმოქმედო ღონისძიებები იმართებოდა.

ახლა, როცა მკურნალობის ძირითადი პროცედურა დასრულებულია, გოგონას დასახმარებლად დაწყებული კამპანიის მიზნები მეტად ფართო და გრძელვადიანია. მასში ჩართული ადამიანები აპირებენ, დღის წესრიგში არსებულზე მეტად ნათლად დააყენონ საკითხები, რომელთა გადაუჭრელობაც ლეიკემიისა თუ მისგან გამოწვეული სიკვდილიანობის რისკებს ზრდის.

“როცა თუთას დიაგნოზი გავიგე, იმდენად უცხო ამბავი იყო ჩემთვის, საერთოდ ვერ წარმოვიდგენდი. პირველი 1 თვე, უბრალოდ, არ მჯეროდა. დაავადების სახელიც არ ვიცოდი მანამდე.

გვსურს, კარგად გავერკვეთ ამ საკითხში. გაირკვეს პროცენტული მაჩვენებელი, მისი ზრდის მიზეზები, გვინდა, ამ პროცესში ჩვენი წვლილი შევიტანოთ. ვცდილობთ, სხვა ბავშვებსაც დავეხმარობთ. ბარებში ვთხოვთ ხოლმე ჩვენს ნაცნობებს, რომ საქველმოქმედო საღამოები გაგვაკეთებინონ, – უყვება თუთას მამა “ნეტგაზეთს”.

რას აკეთებს სახელმწიფო ლეიკემიით დაავადებული ბავშვებისთვის?

ჯანდაცვის სახელმწიფო პროგრამებიდან ერთ-ერთი ვრცელდება ონკოჰემატოლოგიური დაავადებების, მათ შორის, ლეიკემიის ნებისმიერი ფორმის მქონე ბავშვებზე. სახელმწიფო მათ მკურნალობას, მედიკამენტების ჩათვლით, 100%-ით აფინანსებს. დაფინანსება მხოლოდ ტრანსპლანტაციაზე არ ვრცელდება.

რაც შეეხება კონკრეტულ შემთხვევებს, როგორიც არის მკურნალობის საზღვარგარეთ გაგრძელება, ჯანდაცვის სამინისტროს პროგრამების მართვის სამსახურში აცხადებენ, რომ ამისთვის სპეციალური კომისია მოქმედებს, რომელზე მიმართვაც ნებისმიერ მსურველს შეუძლია.

ნეტგაზეთის მასალების სხვა გამოცემებში გადაბეჭდვის წესი


ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან