ახალი ამბები

#თუთასთვის – კამპანიის ფარგლებში 200 000 ლარამდე შეგროვდა

19 იანვარი, 2018 • 20893
#თუთასთვის – კამპანიის ფარგლებში 200 000 ლარამდე შეგროვდა

#თუთასთვის – ასე წერია სამაჯურებზე, რომლებიც დღეს, 19 იანვარს, დედაენის ბაღში ძალიან ბევრმა ადამიანმა მოირგო. საქველმოქმედო ღონისძიებაზე მისულები ასევე იძენდნენ ბრელოკებს, ყელსაბამებსა თუ ბეჭდებს, ზედ თუთას სახელით და, რაც მთავარია, თუთასთვის.

1 წლისა და 7 თვის თუთასთვის, რომელსაც სულ ცოტა ხნის წინ მწვავე ლიმფობლასტური ლეიკემიის დიაგნოზი დაუსვეს, მოქალაქეები თანხას ბოლო ერთი კვირაა აგროვებენ.

გოგონას საზღვარგარეთის კლინიკაში მკურნალობისთვის საჭირო თანხის შესაგროვებლად კამპანია თავიდან  ვიწრო წრეში და მცირე მასშტაბებით დაიწყო.  როგორც თუთას მამამ, ანთიმოზ ცქიტიშვილმა “ნეტგაზეთს” უთხრა,   ახლო მეგობრებმა შემდგომი აქტივობების დასაგეგმად თავდაპირველად ფეისბუქში დახურული ჯგუფი გახსნეს, რომელიც მალე ფართო საზოგადოებისთვისაც გახდა ხელმისაწვდომი და დიდ გაერთიანებად ჩამოყალიბდა.

მისი თქმით, მცირე დროში მკურნალობისთვის საჭირო 150 000 ევროდან  უკვე 200 000 ლარამდეა შეგროვილი.

“პირველივე დღეს ჩვენმა ახლო მეგობრებმა ჯგუფი შექმნეს, სადაც, ალბათ, ასე 50 კაცი განიხილავდა ამ მდგომარეობას, ფულის შოვნის გზებს… მეორე დღეს გახსნეს ეს ჯგუფი და უცებ ძალიან დიდი თანადგომა წამოვიდა, აბსოლუტურად ყველა ჩაება. ყველასგან ძალიან დიდი თანადგომა ვიგრძენი, ალბათ, მთელი ცხოვრება ვალში ვიქნები ამ ხალხთან”, – ამბობს ანთიმოზ ცქიტიშვილი.

თუთა მკურნალობის კურსს ამჟამად თბილისის იაშვილის სახელობის ბავშვთა კლინიკაში გადის. მკურნალობის კურსს სახელმწიფო აფინანსებს, თუმცა პროცედურების გასაგრძელებლად ოჯახს მისი გერმანიის ერთ-ერთ კლინიკაში გადაყვანა სურს. კამპანიის ფარგლებში თანხა სწორედ ამისთვის გროვდება.

“იქ უფრო მეტია რისკების მართვის კუთხით გამოცდილება. აქ კი ხდება ამის მკურნალობა, მაგრამ რაღაც დასაშვები გართულებების შემთხვევაში უფრო მეტი რისკია, თუ საქართველოში დარჩება. და, რა თქმა უნდა, პირობებიც გაცილებით უკეთესია იქ. პატარაა და ძალიან სუსტი. ვირუსიც შეხვდა ახლა, რომელიც ჯერ ვერ დაძლია და გარკვეული რისკების გამო, გვირჩიეს გადაყვანა”, – ამბობს თუთას ბებია მარიკა გორგაძე.

თუთას მკურნალობის პროცედურისათვის თანხის შეგროვების პროცესი სხვადასხვა პლატფორმაზე, ვირტუალურ თუ რეალურ სივრცეში გრძელდება. მსურველებს შეუძლიათ ესტუმრონ  ვებგვერდს  tutastvis.com, დარჩნენ გვერდზე და კომპიუტერის გამოთვლითი სიჩქარით გამომუშავებული კრიპტოვალუტით კამპანიის ნაწილი გახდნენ.

 

რას აკეთებს სახელმწიფო ლეიკემიით დაავადებული ბავშვებისთვის?

ჯანდაცვის სახელმწიფო პროგრამებიდან ერთ-ერთი ვრცელდება ონკოჰემატოლოგიური დაავადებების, მათ შორის, ლეიკემიის ნებისმიერი ფორმის მქონე ბავშვებზე. სახელმწიფო მათ მკურნალობას, მედიკამენტების ჩათვლით, 100%-ით აფინანსებს. დაფინანსება მხოლოდ ტრანსპლანტაციაზე არ ვრცელდება.

რაც შეეხება კონკრეტულ შემთხვევებს, როგორიც არის მკურნალობის საზღვარგარეთ გაგრძელება, ჯანდაცვის სამინისტროს პროგრამების მართვის სამსახურში აცხადებენ, რომ ამისთვის სპეციალური კომისია მოქმედებს, რომელზე მიმართვაც ნებისმიერ მსურველს შეუძლია.

“ჯანდაცვის პროგრამებს შორის ერთ-ერთი არის ონკოჰემატოლოგიური დაავადებების მქონე 18 წლამდე ასაკის ბავშვთა მომსახურება, რომელიც გულისხმობს როგორც ამბულატორიულ, ისე სტაციონარულ მკურნალობას. ეს მოიცავს ყველა საჭიროებას, რაც მათ აქვთ, ქიმიოთერაპიის ჩათვლით, გარდა ტრანსპლანტაციისა, და ფინანსდება 100%-ით.

რაც შეეხება იმ სერვისებს, რომლებიც არ არის ამ პროგრამით გათვალისწინებული,რაც უმეტესად ტრანსპლანტაციას ეხება, ეს ფინანსდება წილობრივად, რეფერალური მომსახურების პროგრამის ფარგლებში. ინდივიდუალური ქეისები განიხილება და აფინანსებს სხვადასხვა სერვისს როგორც საქართველოში, ისე მის ფარგლებს გარეთ”, – განუცხადა პროგრამების მართვის სამსახურის უფროსმა ეკა ადამიამ “ნეტგაზეთს”.

 

მასალების გადაბეჭდვის წესი