ახალი ამბები

10 თვეში გამონაბოლქვის ნორმასთან შეუსაბამობის გამო 6 100-ზე მეტი ავტომობილი დაჯარიმდა

9 ივლისი, 2024 •
10 თვეში გამონაბოლქვის ნორმასთან შეუსაბამობის გამო 6 100-ზე მეტი ავტომობილი დაჯარიმდა

გარემოსდაცვითი ზედამხედველობის დეპარტამენტის ინფორმაციით, 2023 წლის 4 სექტემბრიდან 2024 წლის 4 ივლისის ჩათვლით ავტოსატრანსპორტო საშუალებების გამონაბოლქვის ნორმასთან შეუსაბამობის 6 189 შემთხვევა გამოვლინდა.

უწყების ცნობით, ყველაზე მეტი – 2946 დარღვევა დაფიქსირდა თბილისში, 1242 – ქუთაისში, 1051 – ბათუმში, 950 კი, ქალაქ რუსთავში. გარემოსდაცვითი ზედამხედველობის დეპარტამენტის თანამშრომლების მიერ დაჯარიმებული 6189 სამართალდამრღვევიდან, 5405 ფიზიკური პირია, ხოლო 784 – იურიდიული პირი.

გარემოსდაცვითი ზედამხედველობის დეპარტამენტის თქმით, 3837 საჯარიმო ქვითარი მსუბუქი ავტომობილების მძღოლების მიმართ არის შედგენილი, 2086 – მიკროავტობუსის, 259 – სატვირთო ავტომობილის, 7 კი – ავტობუსის მძღოლების სახელზე შედგა.

„ავტოსატრანსპორტო საშუალებების გამონაბოლქვის კანონმდებლობით დადგენილ ნორმასთან შეუსაბამობისთვის, ფიზიკური პირის შემთხვევაში, ჯარიმის ოდენობა პირველ ჯერზე 100 ლარია, მეორე ჯერზე – 300 ლარი, მესამე ჯერზე – 600 ლარი. იურიდიული პირის შემთხვევაში კი, ჯარიმა 500, 1500 და 3000 ლარია. ჯარიმის 10 დღის ვადაში გადახდის შემთხვევაში სამართალდამრღვევს ჯარიმის ოდენობა 20%-ით შეუმცირდება.

პარალელურად, გარემოსდაცვით ზედამხედველობის დეპარტამენტი ავტოგასამართ სადგურებზე საწვავის ხარისხის კონტროლს რეგულარულად ახორციელებს, რათა მინიმუმამდე შემცირდეს არაკონდიციური საწვავის მოხმარება, რაც, თავის მხრივ, მნიშვნელოვნად ამცირებს ატმოსფერულ ჰაერში მავნე ნივთიერებათა გაფრქვევას. კომპლექსურად, ყველა ეს მიმართულება ხელს უწყობს ატმოსფერული ჰაერის ხარისხის დაბინძურების მინიმუმამდე დაყვანას“, — აცხადებენ დეპარტამენტში.

მასალების გადაბეჭდვის წესი