გარდა საერთაშორისო ორგანიზაციებისა, პორეზიდენტი უკვე შეხვდა წამყვანი ქართული ტელევიზიების ხელმძღვანელებს და საინფორმაციო სამსახურების უფროსებს. ადმინისტრაციის ცნობით, შეხვედრას, რომელიც საქართველოს პრეზიდენტის ინიციატივით გაიმართა, თითქმის ყველა ტელევიზიის წარმომადგენელი დაესწრო, შეხვედრის მთავარი თემა მედიაში შექმნილი ვითარება იყო.
ამავე კონსულტაციების ფარგლებში, პრეზიდენტი უკვე შეხვდა “თავისუფალი დემოკრატების”, არასაპარლამენტო ოპოზიციის, “ერთიანი ნაციონალური მოძრაობისა” და მედიის წარმომადგენლებს.
საქართველოს პრეზიდენტის განცხადებით, ბოლო დღეებში განვითარებულმა პროცესებმა მოახდინა პოლიტიკური კლიმატის ესკალაცია და შექმნა კონსტიტუციური წესრიგის დარღვევისა და სამოქალაქო დაპირისპირების წინაპირობები. მისივე განცხადებით, ირაკლი ღარიბაშვილის გამოსვლამ სიტუაციის განმუხტვის ნაცვლად ისედაც რთულ ვითარებაში მეტი დაძაბულობა შემოიტანა.
პრეზიდენტის განცხადებით, პოლიტიკურ პარტიებთან, მედიის წარმომადგენლებთან, NGO–ებთან და დიპლომატიურ კორპუსთან კონსულტაციების გამართვის გადაწყვეტილება სწორედ არსებული ვითარებიდან გამომდინარე მიიღო.
