ონკოლოგიურმა პაციენტებმა და მათი ოჯახის წევრებმა საქართველოს პარლამენტთან გამართეს აქცია, სახელწოდებით “მინდა ვიცოცხლო!”. აქციის ორგანიზატორები ორგანიზაცია “კავშირი სიცოცხლისთვის წარმომადგენლები არიან.
ონკოპაციენტების აქცია საქართველოს პარლამენტთან. 3 მარტი, 2024. ფოტო: მარიამ ბერიძე/ნეტგაზეთი
რიგით მეოთხე აქციის მთავარი მოთხოვნა ონკოპაციენტების მკურნალობისთვის სახელმწიფოს ბიუჯეტიდან წლიურად გამოყოფილი 25000-ლარიანი ლიმიტის მოხსნა და მკურნალობის სრული დაფინანსებაა. ასევე აქციის მონაწილეები ითხოვენ მედიკამენტების დეფიციტის აღმოფხვრას.
“დღეს ჩვენ ვიბრძვით იმისთვის, რომ ონკოპაციენტებს ჰქონდეთ კანონით მინიჭებული ჯანმრთელობის უფლება. ეს უფლება მოიაზრებს იმას, რომ საქართველოში ყველა მოქალაქეს უნდა ჰქონდეს ხელმისაწვდომობა ხარისხიანი ჯანმრთელობის დაცვის სერვისებზე. ონკოპაციენტებისთვის თითოეული დღე გადამწყვეტია. დღეს კი ჯანდაცვის სამინისტრო ონკოპაციენტებს უშვებს ბიუროკრატიულ მანქანაში” – განაცხადა ორგანიზაცია “კავშირი სიცოცხლისთვის” დამფუძნებელმა გვანცა აფხაიძემ.
გვანცა აფხაიძემ აქციაზე განაცხადა, რომ ონკოპაციენტები თვეობით ელოდებიან დაფინანსებას, ხოლო საჭირო წამლები ქვეყნის ბაზარზე გაყიდვაში არ არის.
“მკურნალობის ვადის გადაცილება შეიძლება მხოლოდ 3 დღე. ონკოპაციენტებს ორი-სამი თვე ლოდინი ნამდვილად არ შეუძლიათ, რადგან კიბო პროგრესირებადია. ორშაბათიდან უკვე შევხვდებით საელჩოებს. ოფიციალური წერილით უკვე მივმართეთ პრემიერს. დიდი იმედი გვაქვს, რომ პრემიერი გამოვა კონტაქტზე, შეგხვდება და მოისმენს ამ ადამიანების პრობლემებს “- ამბობს გვანცა აფხაიძე.
ონკოპაციენტების აქცია საქართველოს პარლამენტთან. 3 მარტი, 2024. ფოტო: მარიამ ბერიძე/ნეტგაზეთი
ორგანიზაცია “კავშირი სიცოცხლისთვის” წარმომადგენელმა ვანო იორამაშვილმა განაცხადა, რომ ისინი პრემიერისგან ითხოვენ სამუშაო ჯგუფის შექმნას, რომელიც ონკოპაციენტების პრობლემების მოგვარების საკითხზე იმუშავებს.
“არ შეიძლება, რომ თვეობით ელოდებოდნენ დაფინანსებას. არ შეიძლება, რომ ონკოპაციენტებმა მთელ ქვეყანაში დაფინანსებული პრეპარატი ვერ იშოვონ. არ შეიძლება, რომ ჩვენს სიცოცხლეზე არსებობდეს ლიმიტი, იქნება ეს 25 000 ლარი, მეტი თუ ნაკლები” – განაცხადა იორამაშვილმა აქციაზე.
ონკოპაციენტების აქცია საქართველოს პარლამენტთან. 3 მარტი, 2024. ფოტო: მარიამ ბერიძე/ნეტგაზეთი
“ვაპროტესტებთ იმას, რომ წამლები არ არის ქვეყანაში. წამლები, რომლებიც ონკოპაციენტების სიცოცხლისთვის აუცილებელია” – ამბობს აქციის ერთ-ერთი მონაწილე ასმათ მიქაძე.
“ისეთ სიტუაციაში ვართ, რომ ადამიანები, ვინც არიან საქართველოში, წამალს ვერ იღებენ. ხოლო ვინც სხვა ქვეყანაში წავიდა – ეუბნებიან, აქ დაბრუნდნენ, რადგან ჰგონიათ, რომ საქართველოში მკურნალობა უფასოა” – ამბობს ასმათ მიქაძე.
26 თებერვალს ორგანიზაციამ “კავშირი სიცოცხლისთვის” პრემიერ მინისტრის სახელზე, საქართველოს მთავრობის კანცელარიაში წერილი შეიტანა.
ონკოპაციენტების აქცია საქართველოს პარლამენტთან. 3 მარტი, 2024. ფოტო: მარიამ ბერიძე/ნეტგაზეთი
