დღეს, 20 თებერვალს, ქართულმა ავიაკომპანია Georgian Wings-მა თბილისი-კიშინიოვის მიმართულებით პირველი რეგულარული ფრენა შეასრულა.

Georgian Wings-ის პრეზიდენტ შალვა კიკნაძის განცხადებით, ავიაკომპანია Geosky-ის სამგზავრო მიმართულება Georgian Wings თბილისი-კიშინიოვი-თბილისის მიმართულებით რეისებს კვირაში ორჯერ შეასრულებს:

„გადაწყვეტილება იქნა მიღებული კიშინიოვის მიმართულებით ფრენების დაწყების თაობაზე, გაზრდილი მოთხოვნიდან გამომდინარე, აღნიშნული ფრენა უფრო დააახლოებს საქართველოსა და მოლდოვას და ხელს შეუწყობს ორ ქვეყანას შორის ტურიზმის ზრდას“, — აღნიშნა ავიაკომპანიის პრეზიდენტმა.

ფრენების დაწყებას გამოეხმაურა საქართველოს საგანგებო და სრულუფლებიანი ელჩი მოლდოვის რესპუბლიკაშიც:

„დღეს სასიხარულო დღე გვაქვს, პირველად დამოუკიდებელი საქართველოს ისტორიაში ქართულმა ავიაკომპანიამ, Georgian Wings-მა დაიწყო პირდაპირი რეისების განხორციელება კიშინიოვის მიმართულებით.

რეისები იქნება კვირაში ორჯერ და არის არაჩვეულებრივი შესაძლებლობა, ჩვენი კულტურა, ჩვენი ქვეყანა უფრო ახლოს გავაცნოთ ჩვენს მოლდოველ მეგობრებს. საკმაოდ აქტიური ტურისტები არიან მოლდოველები, ამიტომ დიდი იმედი მაქვს, ძალიან სწრაფად ერთ-ერთი საყვარელი მიმართულება გახდება საქართველო“, — განაცხადა ლევან დიასამიძემ.

Georgian Wings დღეიდან ფრენებს თბილისი-კიშინიოვი-თბილისის მიმართულებით ყოველ სამშაბათ და შაბათ დღეს, რეგულარულად კვირაში 2 სიხშირით შეასრულებს.