საპარლამენტო უმრავლესობამ დახურა  შეხვედრა პრემიერ-მინისტრობის კანდიდატ ირაკლი კობახიძესთან და ნდობის გამოცხადებისთვის წარდგენილ მთავრობის შემადგენლობასთან.

როგორც ფრაქცია „ქართული ოცნების“ თავმჯდომარემ მამუკა მდინარაძემ განაცხადა, ვინაიდან ეს არის უმრავლესობის შეხვედრა მთავრობის მომავალ შემადგენლობასთან, მისი სპეციფიკიდან და თავისებურებიდან გამომდინარე, უმჯობესია დახურულ რეჟიმში წარიმართოს.

„ბატონი ირაკლი წარმოადგენს პრეზენტაციას. ჩვენ ბევრი დრო არ გვაქვს და ვთხოვთ, რომ რაც შეიძლება მოკლედ. შემდეგ 2-2 წუთი ავიღოთ, რომ კითხვები დავსვათ. მე მგონია, რომ ზედმეტი შეკითხვები არაბუნებრივიც იქნება ჩვენი მხრიდან. წინ გვაქვს ვრცელი დღე, სადაც ასევე მოგვეცემა ჩვენი პოზიციების გამოთქმისა და კითხვების დასმის საშუალება. როგორც შევთანხმდით, ვინაიდან ეს არის უმრავლესობის შეხვედრა მთავრობის მომავალ შემადგენლობასთან, მისი სპეციფიკიდან, თავისებურებიდან გამომდინარე, გთავაზობთ, რომ ეს შეხვედრა იყოს დახურული“, — განაცხადა მამუკა მდინარაძემ.

პრემიერ-მინისტრობის კანდიდატმა გუშინ გამართა შეხვედრა ოპოზიციასთან. დღეს, 8 თებერვალს კი ნდობის გამოცხადებისთვის წარდგენილ მთავრობის შემადგენლობას პლენარულ სხდომაზე მოუსმენენ.