პროკურატურამ ბრალი წარუდგინა კაცს, რომელიც 16 ოქტომბერს შვილის განზრახ მკვლელობისთვის დააკავეს.
“გამოძიებით დადგინდა, რომ 16 ოქტომბერს გორის მუნიციპალიტეტში ბრალდებულმა, შურისძიების მოტივით, მძინარე შვილს ცულით ჭრილობები მიაყენა”, – წერია უწყების განცხადებაში.
შინაგან საქმეთა სამინისტროს ინფორმაციით, ის ადგილზე გარდაიცვალა, ბრალდებული კი სამართალდამცველებმა ცხელ კვალზე დააკავეს.
პროკურატურის მიერ წარდგენილი ბრალი ეხება სისხლის სამართლის კოდექსის 11 პრიმა -109-ე მუხლის “ე” და “კ” ქვეპუნქტებით ჩადენილ დანაშაულს, რაც უმწეო მდგომარეობაში მყოფი ოჯახის წევრის განზრახ მკვლელობას გულისხმობს. უწყება ბრალდებულისთვის აღკვეთის ღონისძიების სახით პატიმრობის შეფარდებას მოითხოვს.