“ქართული ოცნების” თავმჯდომარის, ირაკლი კობახიძის განცხადებით, პოლიცია მაქსიმალურად მობილიზებულია, რომ “თბილისი პრაიდის” კვირეულის ფარგლებში დაგეგმილი ღონისძიებები უსაფრთხოდ ჩატარდეს.
ამის შესახებ მან დღეს, 4 ივლისს, ევროკომისიის რეკომენდაციების შესრულების ანგარიშის წარდგენისას განაცხადა.
როგორც კობახიძემ განაცხადა, საქართველოსთვის ერთ-ერთი მოთხოვნა სწორედ სექსუალური უმცირესობის შეკრების თავისუფლების უზრუნველყოფა და დაცვაა.
“ამ დღეებშიც იმართება შესაბამისი შეკრებები და პოლიცია არის მაქსიმალურად მობილიზებული, რომ უსაფრთხოება იყოს დაცული”, — განაცხადა ირაკლი კობახიძემ.
პრაიდის კვირეულის დასკვნითი ღონისძიება თბილისში 8 ივლისს არის დაგეგმილი.
