ახალი ამბები

ო’ბრაიანის ნათქვამი ინტერპრეტირებულია მედიის მიერ და გამოყენებულია საქართველოს წინააღმდეგ — ფინანსთა სამინისტრო

8 ივნისი, 2023 • 1007
ო’ბრაიანის ნათქვამი ინტერპრეტირებულია მედიის მიერ და გამოყენებულია საქართველოს წინააღმდეგ — ფინანსთა სამინისტრო

საქართველოს ფინანსთა სამინისტრო ეხმაურება საერთაშორისო გამოცემა Politico-ში გამოქვეყნებულ სტატიას, სადაც აშშ-ის სახელმწიფო დეპარტამენტის სანქციების კოორდინატორი, ჯიმ ო’ბრაიანი საქართველოს ასახელებს ერთ-ერთ ქვეყნად, რომელიც „[რუსეთის წინააღმდეგ] სანქციების გვერდის ავლის პრობლემას ქმნის“.

სამინისტროს განცხადებით, საქართველო სრულად იცავს საერთაშორისო სანქციებს, ხოლო ჯიმ ო’ბრაიანისგანცხადების შესახებ ამბობს, რომ “ინტერპრეტირებულია მედიის მხრიდან და გამოყენებულია საქართველოს წინააღმდეგ მორიგი დეზინფორმაციისთვის”.

“სამწუხაროა, რომ ამერიკელი მაღალჩინოსნის განცხადება კვლავ ინტერპრეტირებულია მედიის მხრიდან და გამოყენებულია საქართველოს წინააღმდეგ მორიგი დეზინფორმაციისთვის. აღსანიშნავია, რომ ეს არ არის პირველი შემთხვევა, როდესაც მედიის მიერ ხდება ბ-ნ ჯიმ ო’ბრაიანის ნათქვამის არასწორი ინტერპრეტაცია.

საინტერესოა, რომ Politico პუბლიკაციის საფუძვლად იღებს ამერიკის სახელმწიფო დეპარტამენტის სანქციების კოორდინატორ ჯიმ ო’ბრაიანის მიერ 7-8 ივნისს, საერთაშორისო ანალიტიკური ცენტრის – საგარეო საქმეთა ევროპული საბჭოს (ECFR) მიერ ორგანიზებულ შეხვედრაზე ღია დისკუსიის დროს გამართულ დიალოგს, რომელიც სხვა საკითხებთან ერთად, ეხებოდა რუსეთისთვის საერთაშორისოდ დაწესებულ ეკონომიკურ სანქციებს, მათი შესრულების მხრივ არსებულ გლობალურ გამოწვევებს და აშშ-ის და ევროკავშირის თანამშრომლობას პარტნიორ სახელმწიფოებთან სანქციების შესაძლო გვერდის ავლის რისკების პრევენციის მიზნით.

დისკუსიისას წამოჭრილ საკითხზე, თუ რომელ ქვეყნებთან მიდის მუშაობა სანქციების ეფექტურობის გაზრდის მიზნით და რამდენად წარმატებულად ახერხებს აშშ და ევროკავშირი სანქციების გვერდის ავლის პრევენციას, საქართველო ნახსენები იყო არა როგორც ქვეყანა, სადაც ხდება ჩვენი საერთაშორისო პარტნიორების მიერ დაწესებული სანქციების გვერდის ავლა, არამედ იმ ქვეყნების ჩამონათვალში, რომლებიც აქტიურად თანამშრომლობენ პარტნიორებთან იმისთვის, რომ მაქსიმალურად მოხდეს სანქციების რეჟიმის დარღვევის პრევენცია.

სანქციების აღსრულების მიმართულებით საქართველოსა და შეერთებულ შტატებს შორის აქტიური და ქმედითი თანამშრომლობის გათვალისწინებით, მიუხედავად ზემოხსენებული მედიასაშუალებებისა და ცალკეული პოლიტიკოსების ინტერპრეტაციისა, დარწმუნებულნი ვართ, რომ სანქციების გვერდის ავლის მიზეზად საქართველოს მოაზრება არ ასახავს არც შეერთებული შტატების პოზიციას და არც ჩვენი თანამშრომლობის ხასიათს ამ მიმართულებით.

საერთაშორისო სანქციების დაწესების დღიდან საქართველოს მიერ მიღებულია საბაჟო გამშვები პუნქტებიდან სანქცირებული საქონლის უკან გაბრუნების 1 200-ზე მეტი საბაჟო გადაწყვეტილება, გაფორმების ეკონომიკურ ზონებში საქონლის ექსპორტის ან რეექსპორტის განზრახვის თაობაზე პირის ზეპირი/წერილობითი მომართვისას უარის თქმის 800-ზე მეტი საბაჟო გადაწყვეტილება.

კიდევ ერთხელ ვაცხადებთ, რომ საქართველო სრულად იცავს საერთაშორისო სანქციებს და აქტიურად თანამშრომლობს პარტნიორ ქვეყნებთან”, — აცხადებს სამინისტრო.

დღეს, 8 ივნისს Politico-ს გამოქვეყნებულ სტატიაში ჯიმ ო’ბრაიენი ასახელებს ხუთ ქვეყანას, რომელიც რუსეთის წინააღმდეგ დაწესებული სანქციების ნაწილში “პრობლემას ქმნის”. თურქეთთან, ყაზახეთთან, არაბთა გაერთიანებულ საემიროსა და სომხეთთან ერთად, ო’ბრაიენი ახსენებს საქართველოსაც და ამბობს, რომ რუსეთმა იმპორტის დონის აღდგენა მოახერხა სანქციების გვერდის ავლით. ამერიკელი მაღალჩინოსნის განცხადებით, ომისთვის მნიშვნელოვანი მიკროჩიპებისა და ელექტრონული მოწყობილობების იმპორტი რუსეთში ომამდელ დონეს დაუბრუნდა.

მასალების გადაბეჭდვის წესი