ჯანდაცვის სამინისტრო აცხადებს, რომ სპეციალურმა საბჭომ ამ ეტაპზე აქონდროპლაზიის მედიკამენტის შესყიდვასთან დაკავშირებით რეკომენდაცია არ გასცა.
ჯანდაცვის სამინისტრო აცხადებს, რომ რაკი პრეპარატი დანერგვის ადრეულ ეტაპს გადის და მისი დაფინანსების განხილვა შეჩერებული აქვს გერმანიასა და დიდ ბრიტანეთს – მკურნალობის გრძელვადიან ეფექტურობაზე მწირი ინფორმაცია მოიპოვება.
საუბარია პრეპარატ Voxzogo-ს (აქტიური ნივთიერება – ვიზოდორიტით), რომელსაც ავტორიზაცია მიღებული აქვს აშშ-ს საკვების და წამლის მარეგულირებელი სააგენტოსა (FDA) და ევროპის წამლის სააგენტოს (EMA) მიერ. უწყება ამბობს, რომ ეს ავტორიზაცია მხოლოდ ზოგიერთ შემთხვევაში გამოიყენება.
„იშვიათი დაავადებების საკითხებზე მომუშავე საკოორდინაციო საბჭოზე დეტალურად იქნა განხილული სხვადასხვა ქვეყნების მაგალითები, სადაც მოხდა აღნიშნული მედიკამენტების შესწავლა.
ასევე ჩვენი სამინისტროს მიერ, გასული თვეების განმავლობაში, არის აქტიური შესწავლის ეტაპები გავლილი. აქტიური კომუნიკაცია გვქონდა როგორც ჯანმრთელობის მსოფლიო ორგანიზაციასთან, ასევე პაციენტების უფლებების დაცვის ევროპულ საზოგადოებებთან და სხვადასხვა ქვეყნებთან, სადაც ეს განხილვები მიმდინარეობდა. აღნიშნულის გათვალისწინებით, ამ ეტაპზე, იშვიათი დაავადებების საკითხებზე მომუშავე საკოორდინაციო საბჭოს ამ მედიკამენტის შესყიდვასთან დაკავშირებით სამინისტროსთვის დადებითი რეკომენდაცია არ მიუცია“, – განაცხადა ზურაბ აზარაშვილმა.
უკვე რამდენიმე თვეა, რაც აქონდროპლაზიის მქონე ბავშვთა მშობლები საქართველოში სპეციალური პრეპარატის შემოტანას ითხოვენ.
2021 წელს პრეპარატ Voxzogo-ს (აქტიური ნივთიერება – ვიზოდორიტით) აშშ-ის წამლისა და საკვების ადმინისტრაციამ (FDA), ასევე ევროპის წამლის სააგენტომ (EMA), ავტორიზაცია მისცა. ეს პრეპარატი პირველია, რომელიც გამოიყენება სინდრომისა და გამოწვეული სიმპტომების სამკურნალოდ. პრეპარატი, რომელიც ბავშვებმა 18 წლამდე რეგულარულად, ინიექციურად უნდა მიიღონ, ძალიან ძვირი ღირს.
წაიკითხეთ ვრცლად:
