კვლევითი ორგანიზაცია TBC Capital-ის პროგნოზით, სულ მცირე, 2023 წლის მარტისთვის ლარის საპროცენტო განაკვეთის შემცირებაა მოსალოდნელი.
26 დეკემბერს „თიბისი კაპიტალის“ მთავარი ეკონომისტის ყოველთვიური პროგნოზების შესახებ გამოქვეყნებულ პუბლიკაციაში აღნიშნულია, რომ „ნოემბრის ფასების სხვადასხვა ინდექსი ინფლაციის მოდერაციის დინამიკას აჩვენებს“.
„უფრო მეტიც, ექსპორტისა და იმპორტის შემთხვევაში, დეფლაციური დინამიკა უკვე მეორე თვეა რაც ფიქსირდება“, – წერია პუბლიკაციაში.
ავტორების თანახმად, „სამომხმარებლო კალათაში იმპორტული კატეგორიების ფასებზე სრული ასახვა ჯერ კიდევ მოსალოდნელია“.
თიბისი კაპიტალის მოკლევადიანი პროგნოზირების მოდელის მიხედვით, დეკემბერში, სეზონური ფაქტორების გამორიცხვით, „მცირე, მაგრამ ყოველთვიური დეფლაციაა [ფასების დონის შემცირების პროცესი] მოსალოდნელი“.
თუმცა ეკონომისტები ასევე შენიშნავენ, რომ პროგნოზი ნოემბერშიც ანალოგიური იყო, მაგრამ ფაქტობრივი მაჩვენებელი შედარებით უფრო მაღალი აღმოჩნდა.
„მიუხედავად ამისა, ყოველთვიური ინფლაციის დინამიკა მაინც მნიშვნელოვან დასტაბილურებას აჩვენებს, რაც ეტაპობრივად წლიურ ინფლაციაშიც აისახება“, – წერია დოკუმენტში.
საქართველოს ეროვნული ბანკის მონეტარული პოლიტიკის კომიტეტმა 2022 წლის 21 დეკემბერს მონეტარული პოლიტიკის განაკვეთის (რეფინანსირების განაკვეთი) უცვლელად დატოვების გადაწყვეტილება მიიღო. ამჟამად მონეტარული პოლიტიკის განაკვეთი 11.0 პროცენტს შეადგენს.
TBC Capital-ის შეფასებით, წინა კვირაში საქართველოს ეროვნული ბანკის გადაწყვეტილება მონეტარული პოლიტიკის განაკვეთის უცვლელად დატოვების შესახებ და, „რაც უფრო მნიშვნელოვანია, შედარებით შერბილებული კომუნიკაციის ტონი, იძლევა იმის თქმის საშუალებას, რომ ლარის განაკვეთები მიმდინარე პერიოდის პიკზეა და შემცირება უკვე მომდევნო თვეებში, სულ მცირე, მარტშია მოსალოდნელი“.
„ამ მხრივ საყურადღებოა, რომ ლარის შემოსავლიანობის მრუდი ბოლო პერიოდში კიდევ უფრო შებრუნებულია, ანუ განსაკუთრებით 2- წლიან პერიოდში, რაც უფრო მეტია ვადიანობა, მით უფრო ნაკლებია საპროცენტო განაკვეთი. ეს ბაზრის მონაწილეთა მხრიდან ლარის განაკვეთების შემცირების გაზრდილ მოლოდინებზე მიუთითებს“, – წერია პუბლიკაციაში.
მონეტარული პოლიტიკის განაკვეთი, იგივე რეფინანსირების განაკვეთი, ეროვნული ბანკის ინსტრუმენტია, რომლის ცვლილებაც საბაზრო საპროცენტო განაკვეთების არხით ერთობლივ მოთხოვნას ცვლის. ეს კი, საბოლოო ჯამში, ინფლაციის დინამიკაზე აისახება.
იმ შემთხვევაში, თუ ქვეყანაში მაღალი ინფლაცია ან ამგვარი მოლოდინები არსებობს, როგორც წესი, ეროვნული ბანკი ზრდის რეფინანსირების განაკვეთს.
გარდა საპროცენტო განაკვეთებისა, მონეტარული პოლიტიკის განაკვეთის ცვლილება ეკონომიკაზე ზეგავლენას ახდენს საკრედიტო, გაცვლითი კურსის და მოლოდინების არხებითაც.
მონეტარული პოლიტიკის განაკვეთის ზრდა, თავის მხრივ, აძვირებს ეროვნულ ვალუტაში გაცემულ, განაკვეთზე დამოკიდებულ სესხებს.
