საქართველოს ახალგაზრდა იურისტთა ასოციაციის (საია) თავმჯდომარედ ორგანიზაციის გამგეობამ ნონა ქურდოვანიძე აირჩია. დღესვე გამგეობამ თავმჯდომარის მოადგილედ თამარ ონიანი აირჩია.
საიას ცნობით, ნონა ქურდოვანიძე 2019 წლის მარტიდან ხელმძღვანელობდა ორგანიზაციის სამართლებრივი დახმარების პროგრამას და იყო საიას დირექტორთა საბჭოს წევრი, ხოლო 2016 წლიდან არის საიას გამგეობის წევრი. 2018-2020 წლებში გამგეობის მიერ არჩეული იყო თავმჯდომარის მოადგილედ.
ქურდოვანიძე საქართველოს ახალგაზრდა იურისტთა ასოციაციაში მუშაობს 2009 წლიდან. სხვადასხვა დროს იკავებდა ადვოკატის, დევნილთა უფლებებთან დაკავშირებული პროექტების კოორდინატორის, იურიდიული დახმარების ცენტრის ხელმძღვანელის, წამების მსხვერპლთა უფლებებთან დაკავშირებული პროექტის კოორდინტორის პოზიციებს.
საიას ინფორმაციით, ორგანიზაციის ახალი თავმჯდომარე 2009 წლიდან არის ადვოკატი საერთო სპეციალიზაციით და პირადად აქვს ნაწარმოები 100-ზე მეტ საადვოკატო საქმე საერთო სასამართლოებსა და ადმინისტრაციულ ორგანოებში. არის 10-ზე მეტი კვლევის ავტორი/თანაავტორი, რომელიც მართლმსაჯულებას, ადმინისტრაციულ სამართალდარღვევათა კანონმდებლობას, არასათანადო მოპყრობას, მშვიდობიანი შეკრების უფლებას და გამოხატვის თავისუფლებას, დევნილთა მიმართ სახელმწიფო პოლიტიკას და სათანადო საცხოვრებლის უფლებას შეეხება.
მას მონაწილეობა აქვს მიღებული არაერთ კონფერენციასა თუ სასწავლო პროგრამაში. მათ შორის, არის გერმანიის მარშალის ფონდის სასტიპენდიო პროგრამის (2019 წელი), ვარშავის ევრო-ატლანტიკური საზაფხულო აკადემიის (2021 წელი), უფლებადამცველებისათვის სახაროვის სახელობის პროგრამის (2020), ჯონ სმიტის სასტიპენდიო პროგრამის (2018 წელი), საერთაშორისო ვიზიტორი ლიდერების პროგრამის (IVLP, 2014 წელი), ცენტრალური ევროპული უნივერსიტეტის საზაფხულო სკოლის (2017 წელი) მონაწილე.
ნონა ქურდოვანიძე არის სამართალმცოდნეობის მაგისტრი. ამჟამად სწავლობს რუსეთისმცოდნეობის სადოქტორო პროგრამაზე თბილისის სახელმწიფო უნივერსიტეტში. მისი კვლევითი ინტერესებია რუსეთის ენერგორესურსები, სატრანზიტო დერეფნები და უსაფრთხოების საკითხები სამხრეთ კავკასიაში.
ნონა ქურდოვანიძის არჩევამდე აღნიშნულ პოსტს ნიკა სიმონიშვილი იკავებდა.
