ახალი ამბები

“ქართული ოცნების” კითხვები ქეთევან ჩაჩავას და მისი პასუხები

3 ნოემბერი, 2022 • 1096
“ქართული ოცნების” კითხვები ქეთევან ჩაჩავას და მისი პასუხები

დღეს, 3 ნოემბერს, პარლამენტის ადამიანის უფლებათა დაცვის კომიტეტზე სახალხო დამცველობის კიდევ ერთ კანდიდატს, ქეთევან ჩაჩავას მოუსმინეს.

რამდენიმე კანდიდატის მსგავსად, ქეთევან ჩაჩავასთან დაკავშირებით კითხვები „ქართული ოცნების“ წევრებს მისი საჯარო განცხადებებიდან გამომდინარე ჰქონდათ.

კერძოდ, „ოცნების“ წევრების კითხვები შეეხებოდა ევროინტეგრაციის პროცესსა და არასამთავრობო სექტორთან დაკავშირებით ხელისუფლების წარმომადგენლების განცხადებებზე გამოთქმულ შეფასებებს.

თავდაპირველად აღნიშნულ საკითხებთან დაკავშირებით ჩაჩავას კითხვები დაუსვა „ქართული ოცნების“ წევრმა დავით მათიკაშვილმა. კერძოდ, მისი კითხვები შეეხებოდა ფონდ „ღია საზოგადოება – საქართველოს“ ევროინტეგრაციის პროგრამის ხელმძღვანელის, ვანო ჩხიკვაძისა და ბიოლის ფონდის რეგიონულ დირექტორის, სონია შიფერის სტატიას, რომელიც ევროპული საბჭოს გადაწყვეტილების მიღებამდე გამოქვეყნდა. სტატიაში ოპტიმალურ ვარიანტად წარმოდგენილი იყო, რომ საქართველოს პოტენციური კანდიდატის სტატუსი მიენიჭობოდა.

სწორედ აღნიშნული სტატიის გამო შეადარა ვანო ჩხიკვაძე სერგო ორჯონიკიძეს „ქართული ოცნების“ თავმდჯომარემ ირაკლი კობახიძემ.

დავით მათიკაშვილი: როდესაც სამოქალაქო სექტორის ცალკეული წარმომადგენლების მხრიდან ხდება გარკვეული ანალიზის განხორციელება და შემდგომ ამ ანალიზის ფონზე იდება დასკვნა, რომ საქართველოს არ ეკუთვნის კანდიდატის სტატუსი ევროკავშირიდან, თქვენ როგორ თვლით, ეს რამდენად მისაღები და სწორი ნაბიჯია?

ქეთევან ჩაჩავა: მე ვერ ვიხსენებ სამოქალაქო სექტორის ისეთ წარმომადგენლებს, რომლებმაც თქვეს, რომ საქართველო არ იმსახურებს და არ უნდა იყოს კანდიდატის სტატუსის მიმღებთა შორის.

დავით მათიკაშვილი: საქართველო იმსახურებდა იმ მომენტში და იმსახურებს თუ არა დღეს კანდიდატის სტატუსის მინიჭებას?

ქეთევან ჩაჩავა: მე მინდა, რომ საქართველო იყოს იმ სამეულის წევრი, რომელსაც ექნება კანდიდატის სტატუსი, და დავეწიოთ იმ დაძრულ მატარებელს. შესაბამისად, ყველაფერი  უნდა გაკეთდეს.  მთელი ჩემი ცხოვრება ვაკეთებ ყველაფერს, რომ საქართველო იყოს კანდიდატიც და იყოს ევროკავშირის წევრიც.

დავით მათიკაშვილი: თქვენ გსურთ, რომ იმსახურებდეს, ეს სხვა პასუხია, თუ ასე სვამთ, მაშინ ე.ი. არ იმსახურებდა, მაგრამ მე გეკითხებით, როდესაც გაიხსნა ახალი ფანჯარა საქართველო-მოლდოვა-უკრაინისთვის, იმსახურბედა თუ არა საქართველო კანდიდატის სტატუსს?

ქეთევან ჩაჩავა: ქართველი ხალხი იმსახურებდა ჩვენი ევროპული ფასეულობების დაფასებას და იმედი მაქვს, ეს დაგვიანებული გადაწყვეტილება მალე იქნება.

ამის შემდეგ მათიკაშვილმა  დააზუსტა, რომ მისი კითხვები სწორედ ვანო ჩხიკვაძის სტატიას შეეხებოდა.

დავით მათიკაშვილი: თქვენივე პასუხიდან გამომდინარე, საქართველომ დაუმსახურებლად არ მიიღო კანდიდატის სტატუსი, ფაქტია. როდესაც ამ ფონზე კეთდება კვლევა და ამ კვლევაზე დაფუძნებით განცხადებები, ვანო ჩხიკვაძის განცხადებაზე მაქვს საუბარი, სადაც პირდაპირ არის დასკვნები გამოტანილი, რომ საქართველო არ იმსახურებს კანდიდატის სტატუსს. ეს რამდენად ადეკვატური და რელევანტურია ჩვენი ქვეყნის მოქალაქის და პოლიტიკურ და სამოქალაქო აქტივობაში ჩაბმული ადამიანისთვის?

ქეთევან ჩაჩავა: ახლა მივხვდი, რაზე ვსაუბროთ. ვანო ჩხიკვაძე არის სამოქალაქო აქტივისტი და ევროინტეგრაციის ერთ-ერთი ყველაზე გულანთებული მხარდამჭერი საქართველოში. მე ვიცნობ მის პროფესიულ საქმიანობასაც, მის პოზიციებსაც. იმ სტატიაში, რომელზეც თქვენ საუბროთ, არ იყო საუბარი იმაზე, რომ საქართველო არ იმსახურებს [სტატუსს]. საუბარი იყო, რომ სავარაუდოდ, საქართველოსთან მიმართებაში მოხდება ის, რაც მოხდა ბოსნიის შემთხვევაში.

ამის შემდეგ მათიკაშვილმა ჩაჩავას მისი განცხადებები შეახსენა, სადაც ჩხიკვაძესთან დაკავშირებით „ქართული ოცნების“ წარმომადგენლების შეფასებებს აკრიტიკებდა.

დავით მათიკაშვილი: თუკი საქართველო იმსახურებდა კანდიდატის სტატუსს და დაუმსახურებლად არ მოანიჭეს, თუკი ასოცირების შეთანხმებით ნაკისრ ვალდებულებებს საქართველო ზედმიწევნით კარგად ასრულებდა და უფრო უკეთ, ვიდრე ის ორი ქვეყანა, რომელმაც სტატუსი მიიღო, როდესაც აკეთებ ანალიზს და ასკვნი, რომ საქართველო არ იმსახურებს კანდიდატის სტატუსს და ეს ფასდება როგორც ქვეყნის ღალატი, რატომ შეიძლება ეს ცილისმწამებლურ განცხადებად შეფასდეს? რატომ შეიძლება იმაზე ვისაუბროთ, რომ ვიღაც სამოქალაქო სექტორისგან მტრის ხატს ქმნის? ეს რამდენიმე საჯარო განცხადებაში გაქვთ თქვენ დაფიქსირებული. იყავით თუ არა თქვენ მიკერძოებული, როდესაც ამ განცხადებას აკეთებდით?

ქეთევან ჩაჩავა: სამოქალაქო სექტორის ფუნქცია, ისევე, როგორც სახალხო დამცველის, ხშირ შემთხვევაში არ არის პოპულარული პოზიციების საუბარი. როდესაც ვსაუბრობთ დემოკრატიულ საზოგადოებაზე, მნიშვნელოვანია, რომ ჩვენ ვიყოთ ღია და მოვისმინოთ განსხვავებული პოზიციები. სამოქალაქო სექტორის მრავალფეროვნებაც იმას გულისხმობს, რომ არიან ადამიანები, ექსპერტები, რომლებიც სხვასხვა გამოცდილებასა და პრაქტიკაზე დაყრდნობით აკეთებენ ამა თუ იმ შეფასებებს. შესაბამისად, კრიტიკა აბსოლუტურად მისაღებია.

შესაბამისად, მოღალეტეობაზე, იმ არამეგობრული გარემოს შექმნაზე სამოქალაქო აქტივისტების მიმართ, რომელსაც ბოლო პერიოდში ვხედავთ, და ის განცხადებები, რომელიც მაღალი ტრიბუნიდან კეთდებოდა, ძალიან სამწუხარო იყო და არ შეესაბამებოდა იმ პრინციპებს, საითაც ჩვენი ქვეყანა მიდის.

ამის შემდეგ ჩაჩავას კითხვები დაუსვა „ოცნების“ კიდევ ერთმა წევრმა მიხეილ სარჯველაძემ ისევ მისი საჯარო განცხადებების შესახებ. კერძოდ იკითხა ჩაჩავას იმ განცხადებებთან დაკავშირებით, რომელშიც ამბობს, რომ ევროკავშირის წევრობის კანდიდატის სტატუსის მისაღებად ხელისუფლებამ არასაკმარისი გააკეთა.

ქეთევან ჩაჩავა: მე ვფიქრობ, რომ ბევრი რამის გაკეთება შეიძლებოდა, მათ შორის ეს იქნებოდა ვიზიტები, „კარის ატალახება“. იმიტომ, რომ ჩვენ ბრიუსელში ხშირად გვეუბნებიან, რომ ჩვენ იქ არ უნდა ვიყოთ სტუმრებივით… პირველ რიგში პოლიტიკური ნება და მეტი აქტიურობა იქნებოდა რეკომენდაცია. ჩვენ ვცხოვრობთ ეპოქაში, სადაც განწყობები, ქმედებები და სიტყვები არის ძალიან მნიშვნელოვანი.

დიახ, მე ვიყავი ყველა აქციაზე, რომელიც ეხებოდა ევროინტეგრაციის მხარდაჭერას. ვინაიდან ვფიქრობ და ვფიქრობდი, რომ მნიშვნელოვანია, ჩვენმა დასავლელმა პარტნიორებმა ასევე ნახონ, რომ ყველა ის კვლევა, სადაც საუბარია 80-85%-იან მხარდაჭერაზე ევროინტეგრაციის ნაწილში, რომ ეს რეალურად ასეა, რომ ჩვენი ხალხის დაკვეთაა ეს და არა ამ დროისთვის პრიორიტეტული პროცესი“, – განაცხადა ჩაჩავამ.

მიხეილ სარჯევალძე: თქვენი კრიტიკის მიზეზი იყო ისიც, როგორც თქვენ აფასებთ, დიპლომატიურ კორპუსზე თავდასხმები და ბულინგი. რატოა თავდასხმა? მან ჩაჩავას სთხოვა, რომ კონკრეტული ინფორმაცია დაესახელებინა, რომელიც სიმართლესთან შეუსაბამოდ გავრცელდა

ქეთევან ჩაჩავა: მათ შორის რიტორიკა, რომ ჩვენს დასვლელ პარტნიორებს, რომლებმაც ყველაფერი გაააკეთეს იმისთვის, რომ საქართველოში იყოს მშვიდობა და განვითარება, ამ ჭრილში იყო საუბარი, რომ სურდათ საქართველოს ომში ჩათრევა. ეს იყო დეზინფორმაციული ნარატივის ნაწილი.

ხელისუფლების წარმომადგენლების მხრიდან არასამთავრობო ორგანიზაციებზე დეზინფორმაციის გავრცელებასა და თავდასხმებზე ჩაჩავას კითხვა დაუსვა „ლელოს“ წევრმა ანა ნაცვლიშვილმაც.

„ჩვენ ვსაუბრობდით არასამთავრობო სექტორთან მიმართებით გაკეთებულ შეფასებებზე, სამწუხაროდ, არამეგობრულ გარემოზე, რომელიც იქმნება როგორც სამოქალაქო აქტივისტების, ასევე მედიის წარმომადგენლებისთვის, ეს, რა თქმა უნდა, ძალიან ცუდი ტენდენციაა. მე მესმის, პოლიტიკაში ხანდახან ხდება განცხადებების გაკეთებები, მაგრამ როდესაც ამას სისტემური ხასიათი ეძლევა, როდესაც ხდება მაღალი ტრიბუნის გამოყენება, რა თქმა უნდა, ეს არ არის ჯანსაღი პროცესი.

მნიშვნელოვანია ისიც, რომ ამ პროცესში [არის] დეზინფორმაცია და ვსაუბრობდით ანტიდასავლური პროპაგანდის ელემენტებზე, ვახსენეთ, რომ ამ სექტორის დემონიზაცია დიდი შეცდომა და სამწუხაროა. ეს არ არის პოზიტიური ნაბიჯები, არ არის ეს გზა დემოკრატიის გამყარებისკენ და ძალიან დიდი იმედი მაქვს, მსგავსი რიტორიკა შეწყდება. ძალიან მნიშვნელოვანია, რას როგორ ვამბობთ, განსაკუთრებით მაღალი პოლიტიკური ტრიბუნებიდან“, – განაცხადა ქეთევან ჩაჩავამ.

 

მასალების გადაბეჭდვის წესი