ახალი ამბები

დიახ, ბოლო 2 საუკუნეა, ჩვენი ეროვნულობა თავის თავში მოიცავს ანტირუსობას – უგულავა

5 აგვისტო, 2022 • 590
დიახ, ბოლო 2 საუკუნეა, ჩვენი ეროვნულობა თავის თავში მოიცავს ანტირუსობას – უგულავა

ოპოზიციონერი პოლიტიკოსი გიგი უგულავა ეხმიანება „ქართული ოცნების“ თავმჯდომარის, ირაკლი კობახიძის განცხადებას და ამბობს, რომ რუსეთთან დაკავშირებით ქსენოფობიაზე საუბარი, მხოლოდ მაამებლობა და შინაარსს მოკლებული ოქსიმორონია.

უგულავას თქმით, „ქართული ოცნების“ მთავრობა ყველაზე ბნელი და ფობიებით დატენილია იმ მთავრობებს შორის, ვინც კი საქართველოს ჰყოლია. მისი თქმით, „ოცნება“ ქვეყანას მხოლოდ შიშების წახალისებით მართავს, რაც ძალიან სახიფათოა.

„ქსენოფობია არის ეროვნული ნიშნით არამოტივირებული ზიზღი. მაგალითად, როცა თეა წულუკიანი კნინობითად მოიხსენიებდა ეგვიპტელებს, ირანელებს, ჩინელებს და მათ სავიზო რეჟიმი დაუწესა, ეს ქსენოფობია იყო. მაგალითად, “გარეჯი საქართველოას” პროვოკაციული წინასაარჩევნო კამპანიის შედეგად ანტიაზერბაიჯანული განცხადებები, ქსენოფობიაა.

მაგრამ ქვეყანა, რომელსაც დაპყრობილი აქვს შენი ტერიტორიების 20%, დარბეული და აოხრებული ჰყავს ასობით ათასი შენი მოქალქე, დახოცილი და გაუპატიურებული ჰყავს შენი თანამოქალქეები, ეს ქვეყანა არის შენი მტერი, რომელთანაც ბრძოლაში ყალიბდება შენი ეროვნული იდენტობა. დიახ, ბოლო ორი საუკუნეა ასეა, ჩვენი ეროვნულობა თავის თავში მოიცავს ანტირუსობას.

ცხადია, ეს ჯერ არ ნიშნავს შენს ევროპულობას, მინიმუმ მანამ, სანამ რუსულ მთავრობას ვირჩევთ, მაგრამ ევროპული ერი გავხდებით მაშინ, როცა მტრულ რუსულ მთავრობას არჩევნებითვე გავუშვებთ“, – წერს უგულავა სოციალურ ქსელში.

მისი თქმით, ქსენოფობია უცხოს მიმართ შიშს ნიშნავს და თუ რამე არაა ქართველებისთვის უცხო, ეს რუსების ველურობაა.


„ქართული ოცნება“ გმობს ქსენოფობიურ კამპანიას, რომელიც უხეშად ეწინააღმდეგება საქართველოს კონსტიტუციას და საერთაშორისო სამართლებრივ აქტებს ადამიანის ძირითადი უფლებებისა და თავისუფლებების სფეროში“, — ეს განცხადება 5 აგვისტოს „ქართული ოცნების“ თავმჯდომარემ ირაკლი კობახიძემ პარტიის ოფისში გამართულ პრესკონფერენციაზე გააკეთა.

კობახიძის თქმით, „ნაციონალურ მოძრაობას“, მის სატელიტ პარტიებს, მათ კუთვნილ მედიასაშაულებებს, მათთან დაკავშირებულ კომერციულ სუბიექტებსა და რამდენიმე ყველაზე მდიდარ NGO-ს მარტის დასაწყისში „გაშლილი ჰქონდა სრულიად სამარცხვინო ქსენოფობიური და შოვინისტური კამპანია საქართველოში მყოფი რუსეთის მოქალაქეების წინააღმდეგ“ და ახლა იგივე შემადგენლობა ქსენოფობიური კამპანიის მეორე ტალღის აგორებას ცდილობს.

მან კიდევ ერთხელ გაიმეორა, რომ რუსეთის მოქალაქეებისთვის სავიზო რეჟიმის დაწესების მოთხოვნის უკანაც საქართველოს კონფლიქტში ჩართვა დგას.

ასევე ნახეთ:

 

მასალების გადაბეჭდვის წესი